ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Ստամբուլահայ գեղանկարիչ եւ քանդակագործ Էրոլ Սարաֆյանը պատրաստվում է հոկտեմբերի 25-29-ին Ստամբուլի Քումքափը թաղամասում գտնվող Սուրբ Մարիամ Աստվածածին հայկական եկեղեցում բացել Թուրքիայի առաջին դեմքերի դիմապատկերների ցուցահանդեսը, որոնց նա սկսել է նկարել 1997 թվականից: Դա կլինի նկարչի 9-րդ ցուցահանդեսը, որ նա պարբերաբար բացել է հայկական եկեղեցում:

Այս մասին, ինչպես հաղորդում է «Արմենպրես»-ը, հայտնում է թուրքական «Իհլաս» լրատվական գործակալությունը:

Ցուցադրվելու է 40 կտավ, որոնց մեջ են Թուրքիայի Հանրապետության հիմնադիր Աթաթուրքի, ներկայիս նախագահ Ռեջեփ Թայիփ Էրդողանի, վարչապետ Ահմեթ Դավութօղլուի, 11-րդ նախագահ Աբդուլլահ Գյուլի, Ստամբուլի քաղաքապետ Քադիր Թոփբաշի դիմանկարները:

Նշելով, որ առաջինը կտավին է հանձնել Քադիր Թոփբաշի դիմանկարը, Էրոլ Սարաֆյանն ասել է, որ Թուրքիայի առաջին դեմքերը գոհունակություն են հայտնել իրենց դիմապատկերները տեսնելու ժամանակ:

Ցուցահանդեսի բացմանը հրավիրված է նաեւ Պոլսի հայոց պատրիարքի փոխանորդ, արքեպիսկոպոս Արամ Աթեշյանը: