ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքաբնակ քրդերի «Ժողովուրդների դեմոկրատական կոնգրես» (HDK) կազմակերպությունն իր կողմից տարածված շրջաբերականում նշել է, որ Թուրքիան պետք է ընդունի 1915 թվականին Հայոց ցեղասպանության մեջ իր մեղքը:

Ինչպես հաղորդում է «Արմենպրես»-ը` վկայակոչելով թուրքական ԶԼՄ-ները, HDK-ի կողմից կազմակերպված «Խաղաղության եւ ժողովրդավարության կոնֆերանսի» արդյունարար փաստաթղթում ասվում է. «Սիրիայում քրդերի հանդեպ Թուրքիայի վարած քաղաքականությունը, նախագահ Ռեջեփ Թայիփ Էրդողանի արած հայտարարությունները տարածաշրջանում խաղաղությանը սպառնացող վտանգներ են: Պետք է վերջ դրվի Թուրքիայում ալեւիների ճնշումներին եւ նրանց ձուլման քաղաքականությանը: Հայերի եւ ասորիների դեմ 1915 թվականին իրականացված ցեղասպանության մեջ Թուրքիան պետք է ընդունի իր մեղքը»: