Հայաստանի լրագրողների հավաքականը մրցեց պաշտպանության նախարարության թիմի հետ
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի լրագրողների հավաքականն այսօր մրցեց Պաշտպանության նախարարության թիմի հետ: Ինչպես հաղորդում է «Արմենպրես»-ը, հանդիպումը կայացավ ՊՆ համալիրի մարզադաշտում: Խաղը հիմնականում ընթացավ լրագրողների թիմի առավելությամբ, որն առաջին խաղակեսում մի պահ անգամ հաղթում էր 4:0 հաշվով: Սակայն երկրորդ խաղակեսում ՊՆ ներկայացուցիչներին հաջողվեց բեկել խաղի ընթացքն ու կորզել ոչ-ոքի՝ 8:8 հաշվով:
Լրագրողների կազմում երեքական գոլի հեղինակ դարձան Էդուարդ Քալանթարյանն ու Դավիթ Եղիազարյանը: Մեկական գոլ խփեցին Դավիթ Ալավերդյանն ու Արմեն Կարախանյանը: Լրագրողների թիմը գլխավորում է հեռուստամեկնաբան Կարեն Գիլոյանը:
Լրագրողների Հայաստանի հավաքականը անցկացնում է ընկերական հանդիպումներ տարբեր գերատեսչությունների և մասնավոր ընկերությունների հավաքական թիմերի հետ: Նախորդ անգամ լրագրողների հավաքականը հաղթել էր ՀՀ ԱԺ թիմին` 2:0 հաշվով:
Բաժանորդագրվեք մեր ալիքին Telegram-ում