ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ: Այս օրերին Խորվաթիայի մայրաքաղաք Զագրեբում տեղի է ունենում բռնցքամարտի Եվրոպայի երիտասարդական առաջնությունը, որտեղ Հայաստանը ներկայացված է 9 մարզիկով:

Իրենց մեկնարկային մենամարտերում հաղթանակներ են տոնել 49 կգ քաշային Ալեն Դանիելյանը, 56 կգ քաշային Սպարտակ Թամարյանը, 64 կգ քաշային Արարատ Գյուլբանգյանը և 91 կգ քաշային Սերյոժա Հակոբյանը: Ալեն Դանիելյանը հաղթել է բելառուսցի Վլադիսլավ Կալյանցին, Սպարտակ Թամարյանը` Բելգիան ներկայացնող Լուկա Աստորինոյին, Արարատ Գյուլբանգյանը` ֆինլանդացի Մուհամմադ Աբդիրասսունին, իսկ Սերյոժա Հակոբյանը` լատվիացի Առնոլդաս Տարասկուվեչյուսին: Ցավոք, 52 կգ քաշային Դավիթ Ասատրյանը, 60 կգ քաշային Ժորա Համազարյանը և 75 կգ քաշային Արմեն Մինասյանը չեն կարողացել հաղթահարել մեկնարկային փուլի արգելքը:

«Արմենպրես»-ի հաղորդմամբ, այս մասին տեղեկացնում է Հայաստանի բռնցքամարտի ֆեդերացիան:  Այսօր իրենց երկրորդ մենամարտերը կանցկացնեն Սպարտակ Թամարյանը և Արարատ Գյուլբանգյանը: Ռինգ դուրս կգան նաև 69 կգ քաշային Տիգրան Մելքոնյանը և գերծանր քաշային Գնել Մուրադյանը: