Սպորտի նախարարությունն ավելի խիստ կվերաբերվի արևելյան մարզաձևերի որոշ ֆեդերացիաներին
ԳՅՈՒՄՐԻ, 20 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ սպորտի և երիտասարդության հարցերի նախարարությունն այսուհետ ավելի խիստ մոտեցում կցուցաբերի հանրապետությունում գործող արևելյան մարզաձևերի որոշ ֆեդերացիաների նկատմամբ: Այս մասին լրագրողների հետ հանդիպման ժամանակ հոկտեմբերի 20-ին տեղեկացրեց աշխատանքային այցով Շիրակի մարզում գտնվող ՀՀ սպորտի և երիտասարդության հարցերի նախարար Գաբրիել Ղազարյանը:
Ընդհանուր առմամբ, նախարարի վերաբերմունքն արևելյան մարտարվեստների նկատմամբ բացասական է: «Կա ավելի քան հազար ֆեդերացիա, որոնք ընդհանրպես գրանցված չեն միջազգային որևէ ֆեդերացիայում, և դրանք անցկացնում են առաջնություններ: Նաև կան մարզիկներ, ովքեր պարապում են 6 ամիս և իրենք են բացում ֆեդերացիա ու իրենք էլ մարզում: Սրանք բազմակի՝փաստեր են: Ես գտնում եմ` դա շատ սխալ է»,- նշեց նախարարը՝ վստահեցնելով, որ այսուհետ կլինի լուրջ վերահսկողություն:
«Արդեն կա նախագիծ, որը թույլ կտա այդ ամենը շտկել, օրինակ, լիցենզավորել նույն կարատեի մարզիչներին. չէ որ մեր երեխաների առողջության հետ են խաղում: Դա շատ սկզբունքային հարց է, և մենք պայքարելու ենք դրա դեմ»,- ավելացրեց նախարարը:
Արմենուհի Մխոյան
Բաժանորդագրվեք մեր ալիքին Telegram-ում