Արբաթի թիմը հաղթեց երիտասարդության ռազմամարզական խաղերի Արարատի մարզային փուլում
ԱՐՏԱՇԱՏ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Արտաշատի մարզադաշտում հոկտեմբերի 20-ին տեղի ունեցավ նախազորակոչային եւ զորակոչային տարիքի երիտասարդության հանրապետական ռազմամարզական խաղերի Արարատի մարզային փուլը, որին մասնակցում էր վեց թիմ` ձեւավորված 9-11-րդ դասարանցիներից:
Թիմերը մրցեցին վեց մրցաձեւերում` նռնակի նետում, փոխանցումավազք` ուսապարկով եւ պատգարակով, ձգումներ, 8000մ վազք, հրաձգություն օդամղիչ հրացանով, ինքաձիգի քանդում-հավաքում:
Ավելի քան հինգ ժամ տեւած պայքարից հետո առաջին տեղը զբաղեցրեց Արբաթի միջնակարգ դպրոցը, երկրորդ տեղը` Արտաշատի ավագ դպրոցը, եւ երրորդ տեղում էր Նոյակերտի միջնակարգ դպրոցը: Թիմերը պարգեւատրվեցին ՀՀ սպորտի եւ երիտասարդության նախարարության համապատասխան հավաստագրերով:
Նոյեմբերի 3-6-ը Երեւանի Վազգեն Սարգսյանի անվան ռազմական ինստիտուտում կայանալիք ռազմամարզական խաղերի հանրապետական փուլին մյուս մարզերի եւ մայրաքաղաքի մրցումներում առաջին տեղերը զբաղեցրած թիմերի հետ կմասնակցի նաեւ Արարատի մարզի Արբաթի միջնակարգ դպրոցի թիմը:
Աշակերտների մրցելույթին հեեւում էին Արարատի մարզպետարանի կրթության վարչության աշխատակիցները, հյուրեր: Ինչպես «Արմենպրես»-ին ասաց մարզպետարանի աշխատակազմի կրթության բաժնի առաջատար մասնագետ Սուրեն Շահինյանը, հանրապետությունում անցկացվող հիշյալ ռազմահայրենասիրական խաղերի նպատակն է նախազորակոչային եւ զորակոչային տարիքի երիտասարդության կենցաղում առողջ ապրելակերպի արմատավորումը, հայրենիքի պաշտպանությանը պատրաստ եւ ՀՀ ազգային բանակում ծառայելու համար ֆիզիկապես կոփված երիտասարդների դաստիարակումը:
Խաղերի նախապատրաստման եւ անցկացման աշխատանքները համակարգել է ՀՀ սպորտի եւ երիտասարդության հարցերի նախարարությունը` ՀՀ պաշտպանության նախարարության, ՀՀ զինվորական կոմիսարիատների եւ ՀՀ կրթության եւ գիտության նախարարության աջակցությամբ:
Լիլիթ Մաճկալյան
Բաժանորդագրվեք մեր ալիքին Telegram-ում