ԱԺ-ն կքննարկի սահմանամերձ համայնքներին հարկերից ազատելու օրինագիծը
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության Ազգային ժողովի չորսօրյա նիստերի օրակարգում են կառավարության ներկայացրած «Սահմանամերձ համայնքներում իրականացվող գործունեությունը հարկերից ազատելու մասին» և հարակից օրենքի նախագծերը, ինչպես նաև «Շրջանառության հարկի մասին» ՀՀ օրենքում փոփոխություն կատարելու մասին օրենքի նախագծերը, որոնք կառավարության կողմից ճանաչվել են անհետաձգելի:
Այս մասին ԱԺ քառօրյա նիստի մեկնարկին տեղեկացրեց ՀՀ ԱԺ նախագահ Գալուստ Սահակյանը: «Ներկայացված նախագծերն ընդգրկված են քառօրյա նիստերի օրակարգում ընդգրկված նախագծերի երրորդ բաժնում»,- «Արմենպրես»-ի հաղորդմամբ՝ նշեց Սահակյանը:
Ներկայացված նախագծերով կառավարությունն առաջարկում է հարկերից ազատել սահմանամերձ համայնքներում ձեռնարկատիրական գործունեություն ծավալող անձանց, ինչպես նաև փոփոխություններ կատարել «Շրջանառության հարկի մասին» օրենքում՝ մինչև 2015թ. փետրվարի 1-ը հետաձգելով պարտադիր գույքագրման պահանջը:
Բաժանորդագրվեք մեր ալիքին Telegram-ում