Շենգավիթի թիմը լավագույնն է Հայաստանի աղջիկների առաջնությունում
ԵՐԵՎԱՆ, 20 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի պետական տնտեսագիտական համալսարանի մարզասրահում ավարտվեց մինչև 14 տարեկան հանդբոլիստուհիների Հայաստանի առաջնության եզրափակիչ մրցաշարը: Չեմպիոն դարձավ Շենգավիթի հավաքականը:
Առաջնության վերջին օրը շենգավիթցիները 4-րդ անընդմեջ հաղթանակ տարան` 44:26 (26:10) հաշվով առավելության հասնելով ԽՄՕՄՄ-ի ներկայացուցիչների նկատմամբ: Կրկին վերելքով հանդես եկավ Շենգավիթի հավաքականի ռմբարկուն` Շուշանիկ Եսայանը, որը 18 գնդակ խփեց մրցակցի դարպասը: Նա ճանաչվեց մրցաշարի լավագույն ռմբարկու: Լավագույն խաղարկողը նրա թիմակից Յանա Աբրահամյանն է, իսկ լավագույն դարպասապահը` Աջափնյակի ներկայացուցիչ Էլեն Ոսկանյանը: Ուշադրության կենտրոնում էր նաև ԽՄՕՄՄ-ի դարպասապահ Աստղիկ Բեյլերյանը: Նա 12 տարեկան է և հեռանկային մարզուհի: Վերջին օրն Աջափնյակի ընտրանին 28:16 (11:8) հաշվով առավելության հասավ ԼՂՀ-ի հավաքականի նկատմամբ և իր համար ապհովեց 2-րդ տեղը:
«Արմենպրես»-ի հաղորդմամբ, այս մասին տեղեկացնում է հանդբոլի ֆեդերացիան:
Հավաքականները տեղաբաշխվեցին այսպիսի հերթականությամբ. 1. Շենգավիթ` 8 միավոր, 2. Աջափնյակ (6), 3. ԽՄՕՄՄ (4), 4. ԼՂՀ (4), 5. Քաջարան (0):
Բաժանորդագրվեք մեր ալիքին Telegram-ում