Հայաստանում համերգներով հանդես կգա Հասլև քաղաքի եկեղեցու երիտասարդական երգչախումբը
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ մշակույթի նախարարության, Դանիայում ՀՀ դեսպանության և Հայ Առաքելական եկեղեցու Տավուշի թեմի աջակցությամբ, հոկտեմբերի 10-16-ը Հայաստանում հանդես կգա դանիական Հասլև քաղաքի եկեղեցու երիտասարդական երգչախումբը՝ գեղարվեստական ղեկավար Պիտեր Արենդթի ղեկավարությամբ: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, երգչախմբի երգացանկում մեծ տեղ է զբաղեցնում հայ հոգևոր երաժշտությունը: Երգչախումբը բազմիցս ելույթներ է ունեցել հայաստանյան եկեղեցիներում, մասնավորապես՝ Հաղարծինում, Գոշավանքում, Սանահինում և Հաղպատում:
2014 թվականին երգչախումբը ելույթներով հանդես կգա ՀՀ Տավուշի, Կոտայքի, Սյունիքի մարզերում, ինչպես նաև ելույթ կունենա Նանսենի թանգարանի բացման արարողությանը:
Այցի ընթացքում, երգչախումբը նախատեսում է նաև Հայոց ցեղասպանության հուշահամալիրում տեսահոլովակի նկարահանում՝ 2015 թ. Դանիայում և եվրոպական մի շարք երկրներում ներկայացնելու համար:
Բաժանորդագրվեք մեր ալիքին Telegram-ում