Սանկտ Պետերբուրգում կայացել է ՀՀ անկախության 23-րդ տարեդարձին նվիրված միջոցառում
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Սանկտ Պետերբուրգի հայ մշակութային կենտրոնում սեպտեմբերի 22-ին տեղի է ունեցել ՀՀ Անկախության 23-րդ տարեդարձին նվիրված միջոցառում, որը կազմակերպել էր Սանկտ Պետերբուրգում ՀՀ գլխավոր հյուպատոսությունը:
Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, միջոցառմանը մասնակցել են ՌԴ ԱԳՆ, Սանկտ Պետերբուրգի կառավարության, Լենինգրադի մարզի իշխանությունների ներկայացուցիչներ, Սանկտ Պետերբուրգում հավատարմագրված դիվանագիտական ներկայացուցիչներ, գիտական և մշակութային հայտնի գործիչներ, հայ համայնքի ներկայացուցիչներ, հոգևորականներ:
Ընդունելությանը ելույթով հանդես է եկել Սանկտ Պետերբուրգում ՀՀ գլխավոր հյուպատոս Հրայր Կարապետյանը, ով անդրադարձել է Հայաստանի անկախության 23 տարիների կարևորագույն իրադարձություններին: ՀՀ գլխավոր հյուպատոսը ներկայացրել է միջազգային և տարածաշրջանային հիմնախնդիրների վերաբերյալ ՀՀ մոտեցումները, ինչպես նաև Լեռնային Ղարաբաղի հիմնախնդրի կարգավորման ուղղությամբ Հայաստանի և միջազգային հանրության համատեղ ջանքերը:
Իր ելույթում Հրայր Կարապետյանը ընդգծել է Հայոց ցեղասպանության 100-ամյա տարելիցի կապակցությամբ ամբողջ առաջադեմ մարդկության կողմից դատապարտող դիրքորոշումներ հնչեցնելու կարևորությունը՝ ապագայում նոր ցեղասպանությունները և մարդկության դեմ այլ ոճիրները կանխարգելելու նպատակով:
Միջոցառման ընթացքում ընթերցվել են Սանկտ Պետերբուրգի նահանգապետ Գեորգի Պոլտավչենկոյի, Լենինգրադի նահանգապետ Ալեքսանդր Դրոզդենկոյի և Սանկտ Պետերբուրգի Օրենսդիր ժողովի ղեկավար Վյաչեսլավ Մակարովի շնորհավորական ուղերձներն ու մաղթանքները: Ելույթներով հանդես են եկել Սանկտ Պետերբուրգի կառավարության արտաքին կապերի կոմիտեի նախագահ Եվգենի Գրիգորևը, Էրմիտաժի տնօրեն Միխայիլ Պիատրովսկին:
Միջոցառումն ավարտվել է համերգով, որի ընթացքում հնչել են հայ և ռուս արվեստի գործիչների ստեղծագործությունները:
Բաժանորդագրվեք մեր ալիքին Telegram-ում