Վերջերս տեղացած անձրեւները նպաստավոր են եղել Գեղարքունիքի գյուղատնտեսության համար
ԳԱՎԱՌ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Վերջին մի քանի օրերին Գեղարքունիքի մարզի տարածքով մեկ տեղացած հաճախակի եւ հորդառատ անձրեւները նպաստավոր պայմաններ են ստեղծել գյուղատնտեսության ոլորտում: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի գյուղատնտեսության եւ բնապահպանության վարչության պետ Վանիկ Հովհաննիսյանը, տեւական չորային եղանակներից հետո մարզում տեղացած տեղումները նպաստավոր են եղել ինչպես հողագործության, այնպես էլ` անասնապահության բնագավառների համար: Անձրեւներն առավելապես խթանել են աշնանացան ցորենի ցանքը` փափկեցնելով երաշտի հետեւանքով կապված վարելահողերը եւ նպաստավոր պայմաններ ստեղծելով վարի ու ցանքի աշխատանքների համար:
Սեպտեմբերի 22-ի դրությամբ` մարզում արդեն կատարվել է ավելի քան 7 հազար հեկտար աշնանացան ցորենի ցանք, եւ այն այժմ ընթանում է ամբողջ թափով: Տեւական երաշտը դժվարին վիճակ էր ստեղծել նաեւ անասնապահոթւյան համար` չորացնելով արոտները եւ խաթարելով դրանց վերականգնումը, ինչի արդյունքում նկատելիորեն ընկել էր անասունների մթերատվությունը: Գրանցված տեղումներից հետո չորացած արոտներն արդեն սկսվում են աստիճանաբար վերականգնվել:
Խոսրով Խլղաթյան
Բաժանորդագրվեք մեր ալիքին Telegram-ում