ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Վենեսուելայի նախագահ Նիկոլաս Մադուրոն հայտարարել է տարբեր երկրներից հանրապետություն բժիշկների ժամանելու մասին, որոնք պետք է օգնեն պայքարելու Վենեսուելայում իբր մղվող «մանրէաբանական պատերազմի» դեմ: Ինչպես տեղեկացնում է «Արմենպրես»-ը, այդ հայտարարությունը նա արել է Արագուայի նահանգի Մարակայ քաղաքի հոսպիտալում մահվան մի քանի դեպքերի վերաբերյալ հաղորդումների ստացվելուց հետո, որտեղ մարդիկ մահացել են անհայտ հիվանդությունից: Վենեսուելայի իշխանությունների կարծիքով՝ խոսքը կարող է վերաբերել անհայտ վիրուսի կիրառման օգնությամբ երկրում իրադրությունը ապակայունացնելու ընդդիմության փորձերին:

«Միջազգային պատերազմ է ընթանում, ընկերներ, հայրենակիցներ, պատերազմ նրանց կողմից, ովքեր ցանկանում են ծնկի բերել Վենեսուելան, մանրէաբանական պատերազմ, հոգեբանական պատերազմ, պատերազմ միջազգային ֆինանսների կողմից, բայց Վենեսուելայի դիրքը հաստատ է ամեն ինչում՝ սոցիալական քաղաքականության մեջ, էկոնոմիկայում եւ ֆինանսներում»,- Մադուրոյի խոսքը մեջբերել է Noticias24 հրատարակությունը, հաղորդել է ՌԻԱ Նովոստին: