«Հայաստանը՝ իմ սրտում». մարզերում շարունակվում են տոնական միջոցառումները
18:41, 21 Սեպտեմբեր 2014
ԳԱՎԱՌ, 21 ՍԵՊՏԵՄԲԵՐԻ ԱՐՄԵՆՊՐԵՍ: Սեւան քաղաքում Հայաստանի Հանրապետության Անկախության օրվան նվիրված միջոցառումների մեկնարկը տրվեց սեպտեմբերի 21-ի նախօրեին: Ինչպես «Արմենպրես»-ին տեղեկացրեց Սեւանի քաղաքապետարանի մամուլի քարտուղար Արմինե Ղուկասյանը, Սեւանի քաղաքապետարանի եւ մշակութային կենտրոնի կողմից կազմակերպվել էր «Հայաստանը՝ իմ սրտում» խորագրով նկարչական աշխատանքների մրցույթ-փառատոն, որին մասնակցում էին Հովհ. Այվազովսկու անվան արվեստի դպրոցի եւ Հ․ Իգիթյանի անվան գեղագիտական դաստիարակության կենտրոնի սաները: Չորս անվանակարգերում հաղթող ճանաչվածներն արժանացան պատվոգրերի եւ հուշանվերների: Օրվան նվիրված միջոցառումների ցանկում էր Ս․Զաքարյանի անվան մշակույթի պալատի դահլիճում ցուցադրված «Գարեգին Նժդեհ» ֆիլմը:
Գլխավոր միջոցառումների մեկնարկը տրվեց անկախության օրը: Առավոտից բազմամարդ էր մշակույթի պալատի մերձակա հրապարակը: Գալիս էին աշակերտական եւ աշխատանքային կոլեկտիվներ, Արցախյան հերոսամարտի մասնակիցներ՝ ծաղիկներով, պաստառներով: Սեւանի քաղաքապետ Ռուդիկ Ղուկասյանի գլխավորությամբ մարդկանց բազմությունը շարժվեց քաղաքային պանթեոն, որտեղ հանգչում են Արցախյան հերոսամարտի սեւանցի ազատամարտիկներ:
«Փյունիկ» հուշախաչքարի մոտ երկրապահ կամավորական ջոկատի պատանի մասնակիցները պատրաստել էին ցուցադրական ելույթներ: Քիչ հետո քաղաքային պանթեոնում երթի մասնակիցներին դիմավորեցին երաժշտական դպրոցի փողային նվագախմբի սաները՝ ռազմահայրենասիրական կատարումներով, եւ պատանի երկրապահները: Վեր խոյացող հուշակոթողը ողողվեց ծաղիկներով եւ երիզվեց ծաղկեպսակներով: Օրը շարունակվեց մշակույթի պալատում կազմակերպված տոնական համերգով, որտեղ մասնակիցներին «Սեւան երիտասարդական ակումբ» ՀԿ-ի անդամների կողմից բաժանվեցին հայրենասիրական տողեր ամփոփող եռագույն թերթիկներ:
«Սեւան», «Սուինա -Սեւան» պարային համույթների սաների՝ օրվան համահունչ պարային կոմպոզիցիաները, երիտասարդ երգիչների հայրենասիրական կատարումները, հանդիսավար Գուրգեն Մկրտումյանի պատմագեղարվեստական անցումները, վավերագրական տեսաշարերի ցուցադրումներն ամբողջացրին սեպտեմբերի 21-ի խորհուրդը:
Բաժանորդագրվեք մեր ալիքին Telegram-ում