Քո նվերը զինվորին. ակցիա Երեւանում
ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ: Հայ զինվորն իր հայրենակիցների ուշադրության և սիրո կարիքն ունի: Հենց այս գաղափարախոսությամբ առաջնորդվելով՝ «Civil Voice» հասարակական կազմակերպության նախաձեռնությամբ սեպտեմբերի 21-ին անցկացվեց «Շնորհակալ եմ Քեզ, հայ զինվոր» ակցիան: Միջոցառումն անցկացվեց ՀՀ Անկախության 23-րդ տարեդարձի առթիվ: Նախաձեռնության շրջանակներում ՀՀ քաղաքացիները սահմանային գոտում ծառայող զինվորներին` ի նշան շնորհակալության, ցուցաբերեցին բարոյական և նյութական աջակցություն՝ փոքրիկ նվերի տեսքով:
«Civil Voice» հասարակական կազմակերպության մամուլի պատասխանատու Նունե Ավետիսյանը լրագրողների հետ զրույցում նշեց, որ կազմակերպությունն իրականացնում է սոցիալական և էկոլոգիական ծրագրեր: «Այս միջոցառումը նվիրված է մեր զինվորներին: Որպես առիթ՝ ընտրել ենք Անկախության տոնը: Միջոցառման մասնակիցները Հայաստանի քաղաքացիներն են, ովքեր իրենց մասնակցությամբ երախտագիտություն են հայտնում սահմանում կանգնած զինվորներին: Թեև մենք միջոցառումը նախատեսել էինք անցկացնել սեպտեմբերի 21-ին, սակայն վերջին երկու-երեք օրվա ընթացքում մեր քաղաքացիները կազմակերպության գրասենյակ են բերում իրենց նվերները»,-«Արմենպրես»-ի փոխանցմամբ՝ նշեց Ավետիսյանը:
Նրա խոսքով՝ հայ զինվորին անհրաժեշտ է աջակցել բարոյապես, իսկ նվերները խորհրդանշական բնույթ են կրում:
Սահմանագոտում ծառայող զինվորներին նվերներ փոխանցել ցանկացողները պետք է այն (օրինակ՝ չփչացող սնունդ, հյութ, ծխախոտ, գիրք կամ սեփական ձեռքով պատրաստված որևէ իր) տեղադրեն Երևանի Կասկադի տարածքում կամ Ազատության հրապարակում զետեղված Civil Voice-ի մեծ արկղերում: Միջոցառման ավարտից հետո ՀՀ պաշտպանության նախարարության օգնությամբ ծանրոցները կհասցվեն սահմանագծում կանգնած զինվորներին: «ՊՆ սեպտեմբերի 22-ին կհայտնի, թե որտեղ պետք է ուղարկենք նվերները»,-հավելեց Նունե Ավետիսյանը: Ակցիային արդեն միացել են տարբեր կրթական հաստատությունների, հասարակական կազմակերպությունների ներկայացուցիչներ, հանրության շրջանում հայտնի մարդիկ՝ երգիչ Ֆորշը, Հունահռոմեական ոճի ըմբշամարտի աշխարհի չեմպիոն Արսեն Ջուլֆալակյանը, երգիչ Արթուր Իսպիրյանը և բազմաթիվ քաղաքացիներ:
Կազմակերպիչները խոստանում են, որ միջոցառումը շարունակական բնույթ կկրի, և նմանատիպ ակցիաներ ավելի հաճախ կկազմակերպվեն:
Բաժանորդագրվեք մեր ալիքին Telegram-ում