ՄՄ-ին ՀՀ անդամակցության որոշումը պայմանավորված էր երկրի տնտեսական և ռազմավարական շահերով. ԱԳ նախարար
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Մաքսային միությանը և Միասնական տնտեսական տարածքին միանալու Հայաստանի որոշումը պայմանավորված էր երկրի տնտեսական և ռազմավարական շահերով: Այս մասին Հայրենիք-Սփյուռք 5-րդ համաժողովի մասնակիցների հետ հանդիպմանը նշեց ՀՀ ԱԳ նախարար Էդվարդ Նալբանդյանը: «Եվրասիական բարձրագույն խորհրդի կողմից որոշում է կայացվել ստորագրման ներկայացնել Եվրասիական տնտեսական միության ստեղծման մասին պայմանագրին Հայաստանի միանալու վերաբերյալ փաստաթուղթը, և դա շուտով կիրականացվի»,- «Արմենպրես»-ի հաղորդմամբ՝ հայտնեց նախարարը:
Նալբանդյանը հիշեցրեց, որ անցյալ նոյեմբերին Վիլնյուսում Հայաստանը և Եվրոպական Միությունը համատեղ հայտարարությամբ վերահաստատել են փոխադարձ հետաքրքրություն ներկայացնող բոլոր ոլորտներում համապարփակ համագործակցությունը զարգացնելու և ամրապնդելու հանձնառությունը: «Մենք շարունակում ենք աշխատանքները նաև այս ուղղությամբ: Այդ նպատակով նամակներ են փոխանակվել Հայաստանի Հանրապետության արտգործնախարարի և ԵՄ հանձնակատար Քեթրին Էշթոնի միջև, որտեղ մանրամասն ներկայացված են արվելիք քայլերը»,- փաստեց Նալբանդյանը:
Բաժանորդագրվեք մեր ալիքին Telegram-ում