Նորատուսում ընթանում են մանկապարտեզի շենքի հիմնանորոգման եւ ճանապարհների ասֆալտապատման աշխատանքներ
ԳԱՎԱՌ, 18 ՍԵՊՏԵՄԲԵՐԻ, ԱՐՄԵՆՊՐԵՍ : Նորատուս համայնքում, տեղական բյուջեի եւ «Վորլդ Վիժն Հայաստան»-ի Գավառի տարածքային զարգացման ծրագրի միջոցներով ընթանում են թիվ 2 մանկապարտեզի շենքի հիմնանորոգման եւ գլխավոր ու երկրորդական նշանակության ճանապարհների ասֆալտապատման աշխատանքներ:
Ինչպես «Արմենպրես»-ին տեղեկացրեց Նորատուս համայնքի ղեկավարի տեղակալ Վաչիկ Խաչատրյանը, արդեն երկու ամիս է, ինչ ընթանում են մանկապարտեզի մեկ մասնաշենքի հիմնանորոգման աշխատանքները. փոխվել են տանիքը, դռները, պատուհանները, վերանորոգվել է սանհանգույցը, եւ այժմ ընթանում են ներքին հարդարման աշխատանքները, որոնք կտեւեն եւս մեկ ամիս: Մասնաշենքը նախատեսված է չորս խմբի` 120 երեխայի համար, սակայն այս պահին այն գործում է մեկ մասնաշենքում եւ երկու խմբով: Թիվ 2 մանկապարտեզի հիմնանորոգման ծրագրի արժողությունը կազմում է 8 միլիոն դրամ, որը ներդրել է «Վորլդ Վիժն Հայաստան» կազմակերպության Գավառի ՏԶԾ գրասենյակը:
Աշխատանքներն իրականացնում է «Հազարաշեն» արտադրական կոոպերատիվը: Իսկ շինարարական աշխատանքներում ընդգրված են նաեւ համայնքի բնակիչներ:
Նորատուսի տեղական բյուջեի միջոցներով ասֆալտապատվում են համայնքի մուտք տանող կենտրոնական նշանակության Վարդան Մամիկոնյան եւ դեպի թիվ 3 դպրոց տանող Խաչատուր Աբովյան փողոցները` 900 մետր երկարությամբ: Նախատեսվել է համայնքի բյուջեից ներդնել 50 միլիոն դրամ, որից 30 միլիոնը` Վարդան Մամիկոնյան, իսկ 20-ը` Խաչատուր Աբովյան փողոցների հիմնանորոգման համար: Աշխատանքներն իրականացնում է «Գավառ ՃՇՇ» ԲԲԸ-ն:
«Այս պահի դրությամբ` ավարտվել են Վ. Մամիկոնյան փողոցի ասֆալտապատման աշխատանքները, իսկ Խաչատուր Աբովյան փողոցի հիմնանորոգումն իրականացվել է 30 տոկոսով: Եղանակային բարենպաստ պայամանների դեպքում ճանապարհաշինական աշխատանքներն ավարտին կհասցվեն հոկտեմբերի առաջին տասնօրյակում:
Խոսրով Խլղաթյան
Բաժանորդագրվեք մեր ալիքին Telegram-ում