Ղարաբաղի հակամարտությունը պետք է լուծվի խաղաղ ճանապարհով. ԱՄՆ դեսպանների թեկնածուներ
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում և Ադրբեջանում ԱՄՆ դեսպանների թեկնածուները միակարծիք են` Ղարաբաղի հակամարտության կարգավորումը պետք է լուծվի խաղաղ ճանապարհով: «Արմենպրես»-ն այս մասին տեղեկացավ Հայ Դատի ԱՄՆ հանձնախմբի ֆեյսբուքյան էջից: Սեպտեմբերի 17-ին ԱՄՆ Սենատի հանձնաժողովում լսումների ժամանակ սենատոր Ռոն Ջոնսոնի խնդրանքով Հայաստանում և Ադրբեջանում ԱՄՆ դեսպանների թեկնածուներն իրենց դիրքորոշումն են ներկայացրել Լեռնային Ղարաբաղի հակամարտության խաղաղ կարգավորման բանակցային գործընթացի վերաբերյալ:
Հայաստանում ԱՄՆ դեսպանի պաշտոնի թեկնածու Ռիչարդ Միլզի կարծիքով` հակամարտության կարգավորումը պետք իրականացվի ուժի չկիրառման, տարածքային ամբողջականության, ինչպես նաև ազգերի ինքնորոշման իրավունքի երեք սկզբունքի հիման վրա: Իսկ Ադրբեջանում ԱՄՆ դեսպանի թեկնածու Ռոբերտ Սեկուտան ընդծել է, որ Ղարաբաղի հակամարտությանը ռազմական լուծում չի կարող ունենալ, սակայն խուսափում է բացահայտորեն կոչ անել Ադրբեջանին դադարեցնել ագրեսիան:
Դեսպանների թեկնածուները նաև նշել են, որ ԵԱՀԿ Մինսկի խմբի ձևաչափը բանակցություններն առաջ տանելու լավագույն գործընթացն է:
Բաժանորդագրվեք մեր ալիքին Telegram-ում