ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի իշխանություններին խստորեն անհանգստացրել է նավթի միջազգային գների արագորեն անկումը, որի պետական բյուջեի 80 տոկոսից ավելին ձեւավորվում է նավթային եկամուտների հաշվին:

Ինչպես հաղորդում է «Արմենպրես»-ը` վկայակոչելով ադրբեջանական ԶԼՄ-ները, չնայած դրան, իրեն «լավատեսությամբ» հուսադրած Ադրբեջանի պետական նավթային ընկերության (SOCAR) ղեկավար Ռովնագ Աբդուլլաեւը այսօր Բաքվում լրագրողներին հայտարարել է, որ «տեղին չէ խոսել SOCAR-ի տարեկան եկամուտների վրա նավթի գների կարճատեւ անկման ազդեցության մասին»:

Նրա խոսքով` իրավիճակը գտնվում է «վերահսկողության տակ» եւ նման գործընթացները մշտապես հաշվի են առնվում կանխատեսումներ կազմելու ժամանակ:

Արդեն մի քանի շաբաթ է, ինչ համաշխարհային սակարաններում նավթի գներն արագորեն անկում են գրանցում: Այսօր առավոտյան Brent տեսակի նավթն արդեն սկսել են վաճառել մեկ բարելի դիմաց 96,5 դոլարով: Ադրբեջանի պետբյուջեում նավթի գինը մեկ բարելի դիմաց նշված է 100 դոլար: Եթե նավթի միջազգային գների անկումը տեւականորեն շարունակվի, Ադրբեջանը կկանգնի սնանկացման առաջ, որովհետեւ այդ երկրի ամբողջ տնտեսությունը հիմնված է նավթի եւ նավթամթերքների արտահանման վրա: