Գյումրիում սկսվել է պաթոլոգոանատոմիական լաբորատորիայի շինարարությունը
ԳՅՈՒՄՐԻ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Գյումրիում մեկնարկել է պաթոլոգոանատոմիական լաբորատորիայի շինանարությունը: Նոր կառույցը գտնվում է Գյումրու բժշկական կենտրոնի հարակից տարածքում: Աշխատանքներն իրականացվում են ՀՀ առողջապահության նախարարության և Սոցիալական ներդրումների հիմնադրամի համաֆինանսավորմամբ: Շինարարը խոստացել է շինարարությունն ավարտել ըստ ժամանակացուցի՝ մինչև տարեվերջ, կառույցի շինարարական աշխատանքերին զուգահեռ կբարեկարգվի ու կպարսպապատվի նաև տարածքը: Եթե պաթոլոգոանատոմիական լաբորատորիան կառուցվում է, ինչպես ասում են, զրոյից, ապա Մարալիկում արդեն գրեթե ավարտված են Մարալիկի հիվանդանոցի վերանորոգման աշխատանքները: Ինչպես «Արմենպրես»-ին տեղեկացրեց Շիրակի մազպետարանի առողջապահության և սոցիալական ապահովության վարչության պետ Հովհաննես Հովհաննիսյանը, կան որոշակի խնդիրներ, որոնք լուծելուց հետո հիվանդանոցը լիովին պատրաստ կլինի շահագործման:
Չնայած տարվող աշխատանքերին, մարզում կան այլ բուժհաստատություններ եւս, որոնք ունեն վերանարոգման խնդիր: «Լուրջ խնդիր կա Ախուրյանի բժշկական կենտրոնում, որը վերանորոգման խիստ կարիք ունի, այդպիսին են նաև Գյումրիում թիվ 1 և 2 պոլիկլինիկաները, իսկ տարածքի բարեկարգման խնդիր՝ Ընտանեկան բժշկության կենտրոնը»,-նշեց Հովհաննես Հովհաննիսյանը:
Խոսելով գյուղական համայնքների բուժամբուլատորիաների մասին՝ պատասխանատուն ասաց, որ ընդհանուր առմամբ դրանց վիճակը նորմալ է, խնդիր կա հիմնականում բժշկամանկաբարձական կետերի հետ կապված: «Կան գյուղական համայնքներ, որոնք ունեն նման կետեր, բայց մյուսներում դրանք բացակայում են կամ գործում են հարմարեցված տարածքներում: Եթե քաղաքային բուժհաստատություններում խնդիրնեը շատ թե քիչ լուծված են, ապա որոշակի գյուղական համայնքների բժշկամանկաբարձական կետերի հետ կապված անելիքներ կան»,-ավելացրեց պատասխանատուն:
Արմենուհի Մխոյան
Բաժանորդագրվեք մեր ալիքին Telegram-ում