Ֆինլանդիայում ոչնչացվում է սիրիական քիմիական զենքի վերջին խմբաքանակը
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ֆինլանդիայում ավարտվում է Սիրիայի քիմիական նյութերի ոչնչացման գործընթացը: Ինչպես հաղորդում է «Արմենպրես»-ը՝ վկայակոչելով միջազգային լրատվամիջոցները, ֆիննական «Էկոկեմ» ընկերությունն արդեն ստացել է վտանգավոր նյութերի վերջին խմբաքանակը: Ամերիկյան բռնատար «Քեյփ Ռեյ» նավը Համինի նավահանգիստ է հասցրել սիրիական քիմիական զենքերի 5 հազար տոննա նյութեր: Նախորդ խմբաքանակների նման քիմիական նյութերը կոչնչացվեն բարձր ջերմաստիճաններում:
Փետրվարին «Էկոկեմը» դարձել է Սիրիայի քիմիական զենքերի ոչնչացման համար ընտրված ընկերություն: Ընտրությունը կատարել էր Քիմիական զենքերի արգելման կազմակերպությունը:
Սիրիայի քիմիական զենքերը երկրից դուրս են հանվել 2014թ. հունիսի վերջին: Օգոստոսի սկզբին Քիմիական զենքերի արգելման կազմակերպությունը հայտարարել էր, որ թունավոր նյութերի ավելի քան 80 տոկոսը ոչնչացվել է:
Բաժանորդագրվեք մեր ալիքին Telegram-ում