ԼՂՀ ԱԺ նախագահն այցելել է Արցախի պետական համալսարան
ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Հարգանքի տուրք մատուցելով Արցախյան պատերազմում զոհված ուսանող ազատամարտիկների հիշատակին՝ խորհրդարանի նախագահ Աշոտ Ղուլյանը, ԼՂՀ կրթության և գիտության փոխնախարար Արմեն Սարգսյանը և ԱրՊՀ ռեկտոր Մանուշ Մինասյանը մասնակցել են Մայր բուհում ավանդաբար անցկացվող Անկախության դասին: Այն նվիրված է եղել սեպտեմբերի 1-ի և 2-ի՝ համապատասխանաբար Գիտելիքի, գրի ու դպրության և Լեռնային Ղարաբաղի Հանրապետության հռչակման տոնական օրերին: Ինչպես «Արմենպրես»-ին տեղեկացրին ԼՂՀ Ազգային ժողովի մամուլի ծառայությունից, ողջունելով բուհի պրոֆեսորադասախոսական կազմին և ուսանողությանը՝ խորհրդարանի ղեկավարը շնորհավորել է նոր ուսումնական տարվա մեկնարկի առթիվ: Աշոտ Ղուլյանը կարևորել է Արցախի գիտակրթական համակարգի՝ եվրոպական չափորոշիչներին համապատասխանեցնելու, պետական և մասնավոր հատվածների համար որակյալ ու պահանջված մասնագետների թողարկման հարցերը: ԱԺ նախագահն իր ելույթում անդրադարձել է ԼՂՀ 23-ամյա պատմությանը՝ պարզաբանելով 1991թ. սեպտեմբերի 2-ի Հռչակագրի ընդունման իրավաքաղաքական հիմունքները, Արցախի անկախ պետականության կայացման և ամրապնդման գործընթացի իրողությունները, ներկա քաղաքական զարգացումները:
Խորհրդարանի ղեկավարն ուսանողներին կոչ է արել առավելագույնս օգտագործել ուսումնառության տարիները՝ մասնագիտական պատրաստվածության բարձրացման համար, քանի որ հենց նրանց մրցունակության և ժամանակին համընթաց քայլելու կարողության հետ են կապված Արցախի զարգացման հեռանկարները:
Բաժանորդագրվեք մեր ալիքին Telegram-ում