ԳԱՎԱՌ, 29 ՕԳՈՍՏՈՍԻ, ԱՐՄԵՆՊՐԵՍ: Գեղարքունիքի մարզի Լիճք գյուղում ավարտին են մոտենում նորակառույց եկեղեցու շինարարական աշխատանքները, որոնք մեկնարկել էին 2011 թվականին:

Ինչպես «Արմենպրես»-ին տեղեկացրեց Լիճքի գյուղապետ Գնել Գրիգորյանը, 14 մետր երկարություն, նույնքան լայնություն եւ 20 մետր բարձրություն ունեցող կենտրոնագմբեթ եւ բազալտակուռ եկեղեցու կառուցումը կատարվել է բացառապես լիճքեցիների հանգանակած գումարով, որը կազմել է մոտ 350 հազար ԱՄՆ դոլարին համարժեք դրամ: Օգոստոսի 29-ի դրությամբ` արդեն ավարտվում են գմբեթի տեղադրման եւ ներքին հարդարման աշխատանքները, սեպտեմբերի ընթացքում կավարտվեն արտաքին պատերի հարդարման եւ տարածքի բարեկարգման ու կանաչապատման աշխատանքները: Բացման եւ օծման արարողությունները տեղի կունենան հոկտեմբերին: Եկեղեցու խորանը եւ ներսի պատերը կզարդարեն Աստվածամոր, Հիսուսի, Առաքյալների սրբապատկերները:

Խոսրով Խլղաթյան