«Մեկ համակարգիչ յուրաքանչյուր աշակերտի» ծրագիրը նոր ուստարվանից կիրագործվի նաև Արցախի շրջկենտրոններում
ՍՏԵՓԱՆԱԿԵՐՏ, 29 ՕԳՈՍՏՈՍԻ, ԱՐՄԵՆՊՐԵՍ-ԱՐՑԱԽՊՐԵՍ: Կրթության նոր պահանջներին համապատասխան` միջոցներ են ձեռնարկվում ուսուցիչների վերապատրաստման համար, աջակցություն է ցուցաբերվում տեղեկատվական տեխնոլոգիաների ասպարեզում ինչպես ուսուցիչների, այնպես էլ աշակերտների գիտելիքների ձեռքբերման ու խորացման հարցում: «Արմենպրես»-ի հաղորդմամբ` ինչպես տեղեկացնում է «Արցախպրես»-ը` ԼՂՀ ԿԳ նախարար Սլավա Ասրյանը նշել է, որ այդ նպատակով կյանքի են կոչվում հանրակրթական հաստատություններում նոր տեխնոլոգիաների ներդրման մի շարք ծրագրեր:
Այս համատեքստում նախարարն առանձնացրել է «Մեկ համակարգիչ յուրաքանչյուր աշակերտի» ծրագիրը, որը նոր ուսումնական տարվանից կիրագործվի Սեփանակերտ քաղաքում և շրջկենտրոններում՝ 1-4-րդ դասարանների բոլոր աշակերտների ընդգրկմամբ: Նախարարի համոզմամբ՝ ծրագրի իրականացումը կնպաստի, որպեսզի 1-ին դասարանից սկսած` աշակերտները տիրապետեն տեղեկատվական տեխնոլոգիաներին։
Կշարունակի գործել նաև dasaram.am ծրագիրը, որը ներդրվել է դեռևս անցած ուսումնական տարվա վերջին, և որի նպատակն է դպրոց-աշակերտ-ուսուցիչ կապի ու հարաբերությունների ամրապնդումը։
Բաժանորդագրվեք մեր ալիքին Telegram-ում