Կովկասի մուսուլմանների առաջնորդ Ալլահշուքյուր Փաշազադեն ժամանել Է Թբիլիսի՝ տոնելու իր հոբելյանը
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Կովկասի մուսուլմանների վարչության նախագահ Ալլահշուքյուր Փաշազադեն Վրաց ուղղափառ եկեղեցու ղեկավար Իլյա Երկրորդի հրավերով օգոստոսի 29-ին երկօրյա այցով ժամանել Է Թբիլիսի, որտեղ նա ներկա կգտնվի իր 65-ամյա հոբելյանին նվիրված հանդիսավոր միտջոցառումներին, տեղեկացնում Է «Արմենպրես»-ը՝ հղում անելով «Նովոստի Գրուզիա»-ին: Փաշազադեի հետ Թբիլիսի Է ժամանել պատվիրակություն, որի կազմում ոչ միայն հոգեւոր անձինք են, այլեւ Ադրբեջանի Միլի մեջլիսի պատգամավորներ եւ հանրապետության հասարակական գործիչներ:
Այսօր Ալլահշուքյուր Փաշազադեն հանդիպումներ կունենա Վրաստանի նախագահ Գեորգի Մարգվելաշվիլիի եւ վարչապետ Իրակլի Ղարիբաշվիլիի հետ:
Կովկասի մուսուլմանների վարչության տվյալներով՝ Փաշազադեի հոբելյանի կապակցությամբ Թբիլիսիում ծրագրված են հատուկ նիստ եւ հանդիսավոր միջոցառում, ինչպես նաեւ Վրաստանի պաշտոնատար անձանց կողմից կազմակերպվող ընդունելություններ:
Բաժանորդագրվեք մեր ալիքին Telegram-ում