ՀՀ ԿԳ նախարարը վստահեցնում է, որ Գյումրիում ավագ դպրոցներ չեն փակվի
ԳՅՈՒՄՐԻ, 28 ՕԳՈՍՏՈՍԻ, ԱՐՄԵՆՊՐԵՍ: Շիրակի մարզում ավագ դպրոցներ չեն փակվի: Այս մասին օգոստոսի 28-ին Գյումրիում լրագրողների հետ ճեպազրույցի ժամանակ նշեց ՀՀ ԿԳ նախարար Արմեն Աշոտյանը:
«Խոսքը չի գնում դպրոցներ փակելու մասին: Մենք հնարավորինս զերծ ենք մնում այս քաղաքականությունից և դպրոց փակում ենք ծայրահեղ դեպքում: Ավագ դպրոցների պարագայում խոսքը գնում է ցանցի, կարգավիճակի վերանայման մասին: Այսօր Շիրակի մարզում, հատկապես Գյումրիում շատ են ավագ դպրոցները, վարժարանները, ուսումնարանները, քոլեջները ավելի շատ են քան այդ տարիքային խմբի աշակերտներն են և դպրոցները չեն լցվում, իսկ դպրոցներ չլցվել նշանակում է ցածր ծանրաբեռնվածությամբ աշխատող մանկավարժներ, ցածր որակ, կրթության կազմակերպման համար լրացուցիչ խոչընդոտներ: Խոսքը գնում է Գյումրի քաղաքում դպրոցների կարգավիճակի հնարավոր վերանայման մասին»,- նշեց Արմեն Աշոտյանը:
Ավելացնենք, որ մարզի 169 դպրոցից 4 տարրական, 45-ը հիմնական, 100 միջնակարգ, 2 հատուկ, 1 երեկոյան դպրոցներն են: Մարզում գործում է 3 վարժարան, 14 ավագ դպրոց:
Բաժանորդագրվեք մեր ալիքին Telegram-ում