Շիրակի մարզում շարունակվում է բերքահավաքը
ԳՅՈՒՄՐԻ, 27 ՕԳՈՍՏՈՍԻ, ԱՐՄԵՆՊՐԵՍ: Շիրակի մարզում շարունակվում է բերքահավաքը: Եթե որոշ ցածրադիր գոտիներում այն արդեն ավարտված է, ապա լեռնային հատվածներում՝ Աշոցքի և Ամասիաի տարածաշրջաններում, դեռ շարունակվում է:
Մարզում անցած տարվա աշնանը ցանվել էր 24 հազար հեկտար աշնանացան, իսկ 2014 թվականին իրականացվեց եւս շուրջ 20 հազար հեկտար գարնանացան՝ ըստ այդմ մարզում ցանքատարածությունների ընդհանուր ծավալը կազմեց 44 հազար հեկտար: Մի ցուցանիշ, որը կարելի է լավագույններից մեկը համարել: Գարնանանային բարենպաստ եղանակի և աշնանացան ցորենի հաջող ձմեռացման շնորհիվ գյուղատնտեսները բավական լավ բերք էին սպասում, սակայն, մարզի գյուղատնտեսությունը՝ հիմնականում հացահատիկային մշակաբույսերի ցանքատարածությունները, բավական լուրջ վնասներ կրեցին կարկտահարությունից: Եղան համայնքներ, որոնք եռակի կամ կրկնակի անգամ կարկտահարվեցին:
Ինչպես «Արմենպրես»-ին տեղեկացրեց Շիրակի մարզպետարանի գյուղատնտեսության վարչության պետ Մովսես Մանուկյանը, կարկտարահության հետևանքով մարզում վնասվեց շուրջ 12 հազար հեկտար ցանքատարածություն, որից 11 հազար 500 հեկտարը հացահատիկային մշակաբույսեր են: Մարզի շուրջ 5 հազար հեկտար ցանքատարածություններ վնասվեց 100 տոկոսով: «Եթե դա հաշվի առնելով` հաշվարկենք նախորդ տարվա միջին բերքատվության ցուցանիշով, ապա այդ կորուստը կկազմի շուրջ 15 հազար տոննա: Բացի դրանից, շուրջ 6 հազար հեկտար ցանքատարածություն կարկտահարվել էր մինչև 50 տոկոս, այդտեղ էլ բերքը նվազել է կրկնակի: Այսպիսով, հաշվի առնելով այդ ցուցանիշները, կարող ենք ասել, որ մարզում նախորդ տարվա համեմատ կարկտահարության ընդհանուր համախառն վնասը կազմում է մոտ 25 հազար տոննա: Եղան համայնքներ՝ Տուֆաշեն, Հայկասար, Հայրենյաց, որտեղ բերքն ամբողջովին վնասվել է: Հայկասարի տարածքը կարկտահարությունից տուժել է երկրորդ և երրորդ անգամ: Սա` միայն հացահատիկի մասով, որոշակի վնասներ կրել են նաև կարտոֆիլի և բանջարաբոստանային մշակաբույսերի ցանքատարածությունները` չնայած այս ցանքատարածություններում իրականացվեց լրացուցիչ սնուցում, ինչի արդյունքում, դրանք գրեթե վերականգնվեցին»,-նշեց պատասխանատուն:
Ի դեպ, նախորդ տարի մարզն ունեցել է 130 հազար տոննա համախառն բերք, իսկ այս տարի բերքի միջին ծավալը տատանվելու է 100-105 հազար տոննայի սահմաններում: Խնդիր է ծագել նաև սերմացուի մասով՝ վնասներ կրեցին նաև այն դաշտերը, որոնք ծառայելու էին սերմացուի արտադրությանը: «Այս մասով ՀՀ կառավարությունն ընդառաջ գնաց մեր մարզին՝ տրամադրելով այնքան սերմացու, որքան ներկայացվեց մարզի կողմից՝ ոչ միայն նախապես ներկայացված չափով, այլ նաև կարկտահարված համայնքների կողմից լրացուցիչ ներկայացված ծավալով»,- տեղեկացրեց Մովսես Մանուկյանը:
Ավելացնենք, որ ՀՀ կառավարության որոշմամբ, որպես օգնություն աղետից տուժած համայքներին՝ 2013 թվականի սերմացուի հետվերադարձն իրականացվելու է 2015 թվականի օգոստոսին, տվյալ ամսին էլ այդ հարցը վերանայվելու է:
Արմենուհի Մխոյան
Բաժանորդագրվեք մեր ալիքին Telegram-ում