ԳՅՈՒՄՐԻ, 27 ՕԳՈՍՏՈՍԻ, ԱՐՄԵՆՊՐԵՍ: Շիրակի մարզում սեպտեմբերի 5-ին  կկայանա 16 երթուղիներ սպասարկող տրանսպորտային  միջոցների մրցույթ: Ներկայացված 16 երթուղիները՝ միկրոավտոբուսային և ավտոբուսային, մարզի տարբեր տարածաշրջանների ներհամայնքային և միջմարզային երթուղիներ են:

Ինչպես «Արմենպրես»-ին տեղեկացրեց Շիրակի մարզպետարանի քաղաքաշինության վարչության կապի, տրանսպորտի և ճանապարհաշինության բաժնի պետ Խաչատուր Խնձրցյանը, այս պահին դեռ բաժինը մրցութային որևէ հայտ չի ստացել: «Մարզի բոլոր տարածաշրջաններում էլ այս պահին կան երթուղիներ, որոնք թափուր են: Սրանք հիմնականում «ոչ շահութաբեր» համարվող երթուղիներն են: Նույնիսկ կան երթուղիներ, որոնք մեկ տարի շարունակ հայտարարված մրցույթին որևէ մասնակից չեն ունեցել: Մրցույթներ շատ են հայտարարվել, բայց մասնակցության  հայտեր դեռ չկան: Դրանք ինչպես Ամասիայի, այնպես էլ Աշոցքի և Ախուրյանի որոշ համայնքներ սպասարկող երթուղիներն են»,-նշեց պատասխանատուն:

Հայտերի ընդունման վերջնաժամկետը օգոստոսի 29-ն է:

Արմենուհի Մխոյան