ԱՐՏԱՇԱՏ, 22 ՕԳՈՍՏՈՍԻ, ԱՐՄԵՆՊՐԵՍ: Նոր ուսումնական տարվան ընդառաջ, Արարատի մարզի Բուրաստան համայքում, հանդիսավոր արարողությամբ, համայնքի այս տարի առաջին դասարան հաճախող 19 երեխաներ համայնքապետարանի կողմից ստացան պայուսակներ` անհրաժեշտ բոլոր գրենական պիտույքներով: Գնումներ կատարելիս համայնքապետ Աշոտ Թարվերդյանին իրենց խորհուրդներով օգնել են դասվարներ Ամալյա Սեդրակյանը եւ Աիդա Գլստյանը:

«Արմենպրես»-ի հաղորդմամբ` երեկոյին մասնակցում էին Մասիս գյուղի ուսուցչական կոլեկտիվը, որի դպրոց եւ հաճախելու են փոքրիկները` իրենց համայնքում դպրոց չլինելու պատճառով: Մասիսի դպրոցի փոխտնօրեն Վալյա Նազարյանն իր երախտիքի եւ գնահատանքի խոսքն ասաց համայնքապետարանին` ընդգծելով, որ յուրահատուկ ուշադրությունը երբեք չի ջնջվի փոքրիկների հիշողությունից: Ծնողները եւս շնորհակալություն հայտնեցին գյուղապետ Աշոտ Թարվերդյանին եւ համայնքապետարանի աշխատակիցներին` ուշադրության յուրօրինակ դրսեւորման եւ իրենց հոգսը զգալիորեն թեթեւացնելու համար:

Առաջին դասարանցիներին շնորհավորելու էին եկել նաեւ դպրոցի նախորդ ուսումնական տարվա շրջանավարտները: Նրանք գեղեցիկ երգեր նվիրեցին առաջին դասարանցիներին եւ հորդորեցին լավ սովորել` չկրկնելով իրենց բացթողումները:

Օրվա կապակցությամբ կազմակերպվել էր մանկական տոնական համերգ: Օրն ավարտվեց շքեղ հրավառությամբ:

 Լիլիթ Մաճկալյան