ԵՐԵՎԱՆ, 22 ՕԳՈՍՏՈՍԻ, ԱՐՄԵՆՊՐԵՍ: ՀՀ ԿԳ նախարար Արմեն Աշոտյանի հրամանով սահմանվել է պետության կողմից ուսանողական նպաստի ձևով ուսման վճարի մասնակի փոխհատուցում տրամադրելու նպատակով բարձրագույն ուսումնական հաստատություններում ուսումնառող ուսանողների միջին որակական գնահատականի նվազագույն շեմը: Ինչպես «Արմենպրես»-ը տեղեկացավ ԿԳ նախարար Արմեն Աշոտյանի ֆեյսբուքյան էջի գրառումից, ուսանողների միջին որակական գնահատականի նվազագույն շեմը բակալավրի կրթական ծրագրի համար սահմանվել է 75% /ՄՈԳ/, մագիստրոսի կրթական ծրագրի համար` 80% /ՄՈԳ/:

«Բարձրագույն ուսումնական հաստատությունների ղեկավարները պետք է մինչև տվյալ տարվա սեպտեմբերի 17-ը ՀՀ կրթության և գիտության նախարարություն ներկայացնեն պետության կողմից ուսանողական նպաստի ձևով ուսման վճարի մասնակի փոխհատուցման նպատակով` ուսանողի միջին որակական գնահատականի նվազագույն շեմը հաղթահարած և ընտանիքների անապահովության գնահատման համակարգում հաշվառված` Հայաստանի Հանրապետության կառավարության կողմից սահմանված անապահովության սահմանային միավորից բարձր միավորներ ունեցող ուսանողների անվանացանկը:

Հիշեցնեմ` սա Կառավարության կողմից իրականացվող բարձրագույն կրթության մատչելիթյանն ուղղված կարևորագույն ծրագրերից մեկն է, որն օգնության ձեռք է մեկնում սոցիալապես անապահով ընտանիքների երեխաներին:

Անցյալ տարի ծրագրի շրջանակներում պետությունն աջակցություն է ցուցաբերել մոտ 800 ուսանողի»,-նշված է ԿԳ նախարարի գրառման մեջ: