ՀՀ քաղաքացիները հնարավորություն կունենան գնահատել կադաստրի սպասարկման գրասենյակի աշխատակիցների աշխատանքը
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: ՀՀ կառավարությանն առընթեր անշարժ գույքի կադաստրի պետական կոմիտեն այս տարվա առաջին կեսից մի շարք միջոցառումներ է ձեռնարկել համակարգի աշխատանքներն առավել արդյունավետ դարձնելու նպատակով: Այս մասին, «Արմենպրես»-ի փոխանցմամբ, օգոստոսի 20-ին լրագրողների հետ հանդիպմանը հայտնեց կոմիտեի նախագահ Մարտին Սարգսյանը:
«Մեն քայլեր ենք ձեռնարկել հաստիքների համաչափ ծանրաբեռնվածությունը ապահովելու ուղղությամբ, անհրաժեշտության դեպքում կքննարկվի նաև թերծանրաբեռնված հաստիքները կրճատելու, կառուցվածքային վերակազմակերպումներ իրականացնելու խնդիրը»,-նշեց ՀՀ կադաստրի պետական կոմիտեի նախագահը:
Աշխատանքներ են տարվում նաև վարձակալված տարածքների վարձավճարները նվազեցնելու կամ համակարգի տարածքային մարմինները պետական սեփականություն հանդիսացող տարածքներում տեղակայելու, դրանք միավորելու պիլոտային ծրագրի իրականացման ուղղությամբ:
Ինչպես տեղեկացրեց Սարգսյանը, առանձին բարդ կամ անհասկանալի հարցերի օպերատիվ պարզաբանման նպատակով ստեղծվել է բոլոր ռեգիստների ու մասնագետների առցանց կապ: Բացի այդ, նախատեսվում է հիմնել ուսումնական կենտրոն` սեփական կադրային ռեզերվ ապահովելու համար: Նոր ձայնա-տեսախցիկներով է համալրվել կոմիտեի կողմից որակավորման քննությունների անցկացման լսարանը, ինչը հնարավորություն կընձեռի առցանց հետևել քննությունների ընթացքին:
Քաղաքացիների համար ավելորդ քաշքշուկները վերացնելու նպատակով Երևանի քաղաքպետարանի հետ ստեղծվել է հանձնաժողով` հողհատկացումների, ինքնակամ կառույցների և առհասարակ անշարժ գույքին առնչվող հարցրերը համատեղ քննարկելու համար:
Համակարգի սպասարկման գրասենյակներում իրականացվելու է քաղաքացիների կողմից կադաստրի աշխատակիցների ռեյտինգային գնահատում` տարբեր գույնի կոճակների սեղմման միջոցով:
Նախատեսվում են նաև կադաստրի համակարգի մասին շնորհանդեսային նյութեր, որոնք հնարավորություն կտան այլ երկրներ արտահանել կադաստրային ծրագրերը:
Բաժանորդագրվեք մեր ալիքին Telegram-ում