ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ։ Եթե աշխարհը ժամանակին ճիշտ գնաահատական տար Հայոց ցեղասպանությանը, չէին լինի ոչ Հոլոքոստ, ոչ աշխարհի տարբեր ծայրերում տարբեր ազգությունների նկատմամբ դաժանություններ, այժմ էլ՝ Իրաքում եզդիների նկատմամբ անմարդկային վերաբերմունք։ «Արմենպրես»-ի փոխանցմամբ՝ օգոստոսի 20-ին լրագրողների հետ հանդիպմանը նման տեսակետ հայտնեց «ԼԵՎ Գրուպ» փաստաբանական գրասենյակի ղեկավար Լևոն Բաղդասարյանը։ Ըստ փաստաբանի՝ Իրաքում եզդի ազգի նկատմամբ իրականացված անմարդկային և նվաստացնող վերաբերմունքը հակասում է խոշտանգումների և այլ դաժան, անմարդկային կամ նվաստացնող վերաբերմունքի ու պատժի դեմ ՄԱԿ-ի Կոնվենցիայի 1-ին հոդվածի դրույթներին։ «Այդ հոդվածի դրույթը ենթադրում է ոչ միայն խոշտանգումների կամ պատժի կիրառումից ձեռնպահ մնալու, այլ նաև որոշակի գործողություններ կատարելու պետության պարտականությունը, որը չի կատարվել»,-ասաց Բաղդասարյանը։

Փաստաբանական գրասենյակի ղեկավարը նաև պատրաստակամություն հայտնեց իրավական հարթության վրա պաշտպանել այն բոլոր եզդիների իրավունքները, որոնց իրավունքները խախտվել են ՄԱԿ-ի Կոնվենցիայի 1-ին հոդվածի դրույթների համաձայն։ «Իրավունքների պաշտպանությունը ներառելու է մինչև խախտված իրավունքի իսպառ վերացում, ընդհուպ՝ բարոյական և նյութական վնասի հատուցմամբ»,- հայտարարեց փաստաբանը։

Հայաստանը խորապես անհանգստացած է Իրաքի հյուսիսում եզդի բնակչության հանդեպ շարունակվող զանգվածային բռնությունների և դրա հետևանքով բազմաթիվ մարդկային զոհերի փաստով:  ՀՀ Նախագահի կողմից հանձնարարականներ են տրվել արտգործնա­խարարությանը և դիվանագիտական առաքելու­թյուն­ների ղեկավարներին՝ միջազ­գային ասպարեզում խնդրին պատշաճ մակարդակով հետամուտ լինելու իրենց ջանքերը կրկնապատկելու համար: Նախագահ Սարգսյանը ՀՀ վարչապետի հետ քննարկել է նաև Հայաս­տանի կողմից տրամադրվող մարդասիրական օգնության՝ նախապես ծրագրված (50 հազար դոլար-խմբ.) ծավալներն ավելացնելու հարցը, ինչին ՀՀ կառավարությունը լուծում կտա առաջիկա օրերի ընթացքում: Խնդիրը շարունակելու է մնալ պաշտոնական Երևանի ուշադրության կենտրոնում, և Հայաստանի Հանրապետությունն իր ուժերի չափով հետևողականորեն սատարելու է փորձության մեջ հայտնված բարեկամ եզդի ժողովրդին: