Երևանյան բեսթսելեր 2/25. «Փոքրիկ իշխանը» շարունակում է գերել ընթերցողների սրտերը
ԵՐԵՎԱՆ, 15 ՕԳՈՍՏՈՍԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելեր» հեղինակային նախագծի վարկանիշային աղյուսակն այս շաբաթ գլխավորում է Անտուան դը Սենտ Էքզյուպերիի «Փոքրիկ իշխանը» ստեղծագործությունը: Գիրքն առաջին անգամ հրատարակվել է 1943-ին և համարվում է Էքզյուպերիի ամենահայտնի երկը: Վերջերս այն հայերեն լույս է ընծայել «Անտարես» հրատարակչությունը:
Երկար հիվանդությունից հետո այս տարվա ապրիլի 17-ին կյանքի 88-րդ տարում վախճանված Գաբրիել Գարսիա Մարկեսի «100 տարվա մենություն» վեպը երկրորդ հորիզոնականում է: Այն օրեր առաջ նոր գրքով լույս է տեսել «Բուկինիստ» գրախանութի հրատարակությամբ:
Մարկեսի մեկ այլ`«Վերհիշելով իմ տխուր պոռնիկներին» հայտնի վիպակը երրորդ հորիզոնականում է: «Այն անդիմադրելի ուժը, որը շարժում է աշխարհը, ամենևին երջանիկ սերը չէ, քանի որ սերը դժբախտ է». այս միտքը Մարկեսի վիպակից է, որը դարձել է թևավոր արտահայտություն: Գիրքը 2010 թ. ռուսերենից թարգմանել է Հովհաննես Այվազյանը: Երկը լայն ճանաչում է գտել Հայաստանում` գրեթե միշտ հայտնվելով բեսթսելերների շարքում:
Գարսիա Մարկեսի «Սերը ժանտախտի օրերին» գործը չորրորդ հորիզոնականում է: «Մարդիկ միշտ չէ, որ ծնվում են այն օրը, երբ մայրը լույս աշխարհ է բերել. կյանքը ստիպում է, որ նրանք ծնվեն վերստին և շատ անգամ». հենց այս փիլիսոփայությունն է արծարծում այս յուրահատուկ ստեղծագործությունը:
Գրիգոր Նարեկացու` «Մուղնի» հրատարակչության լույս ընծայած «Մատյան ողբերգության» ժողովածուն զբաղեցնում է հինգերորդ հորիզոնականը: Այն հանրությանը հայտնի է նաև «Նարեկ» անունով և ամենաճանաչված ու կարդացված միջնադարյան հայերեն ստեղծագործությունն է: Ըստ ժողովրդի մեջ արմատացած համոզմունքի, պոեմն առանձնանում է նաև իր հրաշագործ ներգործությամբ և բուժիչ հատկությունով: «Նարեկ»-ն այն բացառիկ գիրքն է, որ նախագիծն սկսելուց ի վեր ամեն շաբաթ եղել է գործակալության վարկանիշային աղյուսակում:
Արձակագիր և թարգմանիչ Զոյա Փիրզադի «Ինչպես բոլոր երեկոները» պատմվածքների ժողովածուն վեցերորդ հորիզոնականում է: Փիրզադը կյանքի իմաստը փնտրում է մարդկային առօրյա հարաբերություններում, առտնին հոգսերում և ուրախություններում:Նա փորձում է շրջապատող աշխարհը ճանաչել չնչին ու աննշմարելի թվացող մանրուքներով: Նրան համարում են մանրամասնի, պարզության, կանացի նուրբ հոգեբանության մեծ վարպետ: Գրականություն է բերել իրականությունը ցույց տալու նոր լեզու, նոր խոսք, նոր թեմատիկա, պատկերավորման նոր միջոցներ, պատումի կառուցման նոր ձև ու եղանակ:
Փիրզադը առաջիններից մեկը իրանական ժամանակակից գրականությունը դուրս բերեց երկրի սահմաններից ու ճանաչելի դարձրեց աշխարհին:
Գրիգոր Նարեկացու «Մատյան ողբերգության. Տաղեր» գիրքը յոթերորդ հորիզոնականում է:
«Մանչեսթեր Յունայթեդի» նախկին գլխավոր մարզիչ Ալեքս Ֆերգյուսոնը «Իմ ինքնակենսագրությունը» գրքում ներկայացրել է իր անցած ուղին: Գիրքն այս շաբաթ ութերորդ հորիզոնականում է: Սըր Ալեքս Ֆերգյուսոնն աշխարհին հայտնի է նախևառաջ որպես բրիտանական և համաշխարհային ֆուտբոլի ամենատիտղոսակիր և տաղանդավոր ֆուտբոլային մարզիչներից մեկը: «Մանչեսթեր Յունայթեդի» մարզչի պաշտոնում անցկացրած 26 տարում նա բազմաթիվ մրցանակներ է նվաճել ու զարմանալի ռեկորդներ գրանցել: Այս գիրքը՝ սըր Ալեքսի ինքնակենսագրությունը, Մեծ Բրիտանիայում ընդամենը մեկ շաբաթվա ընթացքում վաճառվել է ավելի քան 115 հազար տպաքանակով:
Պարույր Սևակի գործերն ամփոփող «Ականջդ բեր ասեմ» իմաստախոսությունների ժողովածուն իններորդ հորիզոնականում է: Գրքում տեղ են գտել հայրենիքին ու հայրենասիրությանը, լեզվին, արվեստին, մշակույթին, սիրուն, բնությանն ու հողին նվիրված, հայ և համաշխարհային գրականության, արվեստի, գիտության ու հասարակական-քաղաքական նշանավոր գործիչներին և իր ժամանակակիցներին նվիրված Պարույր Սևակի խոհափիլիսոփայական ավելի քան 1100 իմաստախոսություն:
«Երևանյան բեսթսելերն» այս շաբաթ եզրափակում է «Ոսկե եղեգն» պետական գրական մրցանակի դափնեկիր երջանկահիշատակ Լևոն Խեչոյանի «Մհերի դռան գիրքը» վեպը, որը լույս է տեսել այս տարի: Գրողի մահից հետո այն հրատարակել է «Անտարես» հրատարակչությունը: Գիրքն առաջին անգամ փետրվարի 28-ին ներկայացվեց հանրությանը և միանգամից ռեկորդային վաճառք արձանագրեց:
Վարկանիշային ցուցակի կազմման հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ գիրք» (54-07-06), «Էդիթ Պրինտ» (57-70-09), «Բյուրոկրատ» (50-01-52), «Բուկինիստ» (53-74-13), «Արտ բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական բնույթի գրքերն ու դասագրքերը:
Տեղ | Փոփ. | Գիրք | Հրատ. | Քանակ | |
1 | 0 |
Անտուան դը Սենտ Էքզյուպերի «Փոքրիկ իշխանը» |
Անտարես | 16 | |
2 | +1 |
Գաբրիել Գարսիա Մարկես «100 տարվա մենություն» |
Բուկինիստ | 14 | |
3 | * |
Գաբրիել Գարսիա Մարկես «Վերհիշելով իմ տխուր պոռնիկներին» |
ՎԱ-ՀԱ | 12 | |
4 | -2 |
Գաբրիել Գարսիա Մարկես «Սերը ժանտախտի օրերին» |
Բուկինիստ | 12 | |
5 | * |
Գրիգոր Նարեկացի «Մատյան ողբերգության» |
Մուղնի | 12 | |
6 | * |
Զոյա Փիրզադ «Ինչպես բոլոր երեկոները» |
Էդիթ Պրինտ | 11 | |
7 | * |
Գրիգոր Նարեկացի «Մատյան ողբերգության.Տաղեր» |
Զանգակ | 10 | |
8 | -3 |
Ալեքս Ֆերգյուսոն «Իմ ինքնակենսագրությունը» |
Անտարես | 8 | |
9 | * |
Պարույր Սևակ «Ականջդ բեր ասեմ» |
Էդիթ Պրինտ | 8 | |
10 | * |
Լևոն Խեչոյան «Մհերի դռան գիրքը» |
Անտարես | 8 |
Աստղանիշով նշված գրքերը ցանկ վերադարձածներն են:
«Երևանյան բեսթսելերը» ներկայացրեց Ռոզա Գրիգորյանը
Բաժանորդագրվեք մեր ալիքին Telegram-ում