Մեկնարկել է Միացյալ Թագավորության Չիվնինգի կրթաթոշակների ծրագրի դիմումների ընդունումը
ԵՐԵՎԱՆ, 1 ՕԳՈՍՏՈՍԻ, ԱՐՄԵՆՊՐԵՍ: Միացյալ Թագավորության արտաքին գործերի նախարարությունը օգոստոսի 1-ից հայտարարել է Բրիտանիայում ուսանել ցանկացողների համար նախատեսված Չիվնինգի կրթաթոշակների ծրագրի մեկնարկի մասին: Ինչպես «Արմենպրես»-ին տեղեկացրին ՀՀ-ում ՄԹ դեսպանատնից, Չիվնինգի կրթաթոշակներ ծրագիրն իրականացվում է աշխարհի ավելի քան 100 երկրներում և այս տարի կֆինանսավորի մոտ 1500 ուսանողի: Կրթաթոշակները տրամադրվում են առաջնորդության ունակություններ ունեցող լավագույն դիմորդներին և ամբողջությամբ ֆինանսավորում Մեծ Բրիտանիայի ցանկացած ԲՈՒՀ-ի մեկ տարվա մագիստրոսի ծրագիր:
Կրթաթոշակի նպատակն է ներգրավել արհեստավարժ մասնագետների, ապագա առաջնորդների, որոշում կայացնողների ու կարծիք ձևավորողների:
Հայաստանում այս տարի ընդունվում են հայտեր տարբեր բնագավառների համար, սակայն առավել խրախուսվում են Միջազգային հարաբերություններ/կոնֆլիկտաբանություն, Հանրային կառավարում, Հանրային քաղաքականություն և կառավարում, Իրավագիտություն և մարդու իրավունքներ, Պաշտպանության ոլորտ, Էկոնոմիկա, Ֆինանսներ, Բիզնես, Ինովացիա մասնագիտություննեը:
Չիվնինգի կրթաթոշակին դիմելու համար տարիքային սահմանափակում չկա: Անհրաժեշտ է ունենալ անգլերենի իմացության համապատասխան վկայական, բարձրագույն կրթության դիպլոմ, լինել Հայաստանի քաղաքացի և ունենալ 2 տարվա աշխատանքային փորձ:
Կրթաթոշակառուները ընտրվում են Բրիտանիայի դեսպանատան և համագործակցող կազմակերպությունների ներկայացուցիչների կողմից: Հայտերի ընդունման վերջնաժամկետն է 2014թ. նոյեմբերի 15-ը: Մանրամասն տեղեկությունների համար պետք է այցելել հետևյալ կայքը:
Բաժանորդագրվեք մեր ալիքին Telegram-ում