Ուսումնասիրություններ Գյումրու «Խաղաղության օղակ»-ի պուրակում
ԳՅՈՒՄՐԻ, 1 ՕԳՈՍՏՈՍԻ, ԱՐՄԵՆՊՐԵՍ: Գյումրիում ստորգետնյա ջրերը, քարիզները, ոռոգման հին համակարգը դարձյալ խնդիրներ են առաջացնում քաղաքապետարանի ու բնակիչների համար: Քաղաքի կենտրոնում և գյումրեցիների կողմից շատ սիրված Գյումրու «Խաղաղության օղակ»-ի պուրակը, որը միշտ մարդաշատ է եղել, տարծքում առկա գարշահոտության հետևանքով այսօր լքված է: Ստեղծված իրավիճակի պատճառով շատերն են փորձում շրջանցել պուրակը: Խնդիրը լուծելու և պուրակում առաջացած ճահճուտի պատճառները հայտնաբերելու նպատակով՝ քաղաքապետարանը տարածքում իրականացնում է ուսումնասիրություններ, կատարվում են տարբեր հատվածների հորատման աշխատանքներ:
Ինչպես «Արմենպրես»-ին տեղեկացրեց Գյումրու քաղաքապետի խորհրդական Արտուշ Մովսիսյանը, հորատման աշխատանքներից հետո պարզ կդառնա ջրերի առաջացման պատճառները, իսկ դրանք կարող են լինել կա՛մ քարիզների, կա՛մ արտեզյան ջրերի հետևանքով: «Այս պուրակը ժամանակին եղել է քաղաքի սիրված հանգստի վայրերից, բայց այս պահին պուրակի մի հատվածը ջրերի պատճառով ճահճացել է: Պետք է նախ պարզվեն այդ ջրերի առաջացման պատճառները, ապա մշակվեն ջրահեռացման մեխանիզմներ, հետո նոր իրականացվեն տարածքի բարեկարգման աշխատանքներ: Ի դեպ, ջուրը լաբորատոր հետազոտության է ենթարկվել, որից պարզ է դարձել, որ դա կեղտաջուր չէ: Դա ևս ինչ-որ տեղ ուրախացնող հանգամանք է, որը հաստատում է, որ պատճառը կոյուղին չէ: Ենթադրություն կա նաև ջրահեռացման հին համակարգի հետ կապված, որը կառուցվել է 50-60 ականներին»,-նշեց Արտուշ Մովսիսյանը:
Ըստ պատասխանատուի, պուրակում աշխատանքների հաջող ընթացքից հետո ուսումնասիրություններ կկատարվեն նաև քաղաքի այլ տարածքներում:
Արմենուհի Մխոյան
Բաժանորդագրվեք մեր ալիքին Telegram-ում