Մարգարիտա Յախոնտովայի մահվան կապակցությամբ կստեղծվի թաղման կառավարական հանձնաժողով
ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: ՀՀ վարչապետի որոշմամբ՝ թատերական քննադատ, ՀՀ արվեստի վաստակավոր գործիչ Մարգարիտա Յախոնտովայի մահվան կապակցությամբ կստեղծվի թաղման կառավարական հանձնաժողով: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, Յախոնտովան վախճանվել է կյանքի 79-րդ տարում:
Այս կապակցությամբ Հայաստանի թատերական գործիչների միության նախագահ Հակոբ Ղազանչյանը ցավակցական խոսք էր գրել ՀԹԳՄ կայքում:
«Կյանքից հեռացավ Երևանի ամենագեղեցիկ կանանցից մեկը, բարձր ինտելեկտի, նուրբ ճաշակի տեր, ազնիվ ու շիտակ անհատականություններից մեկը: Մենք կորցրինք բազմագիտակ, իր ճշմարիտ կեցվածքն ու նկարագիրն ունեցող Մարգարիտա Վիկտորովնային, ով մոտ 50 տարի ծառայեց հայ և ռուս թատրոններին, եղավ Կ. Ս. Ստանիսլավսկու անվան ռուսական դրամատիկական և Հ. Ղափլանյանի անվան դրամատիկական թատրոնների գրական մասի վարիչը, ՀԹԳՄ «Բարեկամություն» թատրոնի գեղարվեստական ղեկավարը, իր բազմաթիվ հոդվածներով զարդարեց հայ և ռուսալեզու մամուլը: Շնորհիվ խոր գիտելիքների, հրաշալի բեմազգացության՝ Մարգարիտա Յախոնտովան ճշգրտորեն էր վերարտադրում ռեժիսորական և դերասանական աշխատանքները, տալիս օբյեկտիվ գնահատականներ: Մեր թատերական կյանքն աղքատացավ մեկ անհատականությամբ ևս, մի գեղեցկություն էլ հեռացավ մեզանից: Հազար ափսոս»,- նշել է Հակոբ Ղազանչյանն՝ իր ցավակցությունը հայտնելով Մարգարիտա Յախոնտովայի ընտանիքին, դստերը՝ Գ. Սունդուկյանի անվան ակադեմիական թատրոնի դերասանուհի, ՀԹԳՄ քարտուղար, «Արմմոնո» փառատոնի տնօրեն Մարիաննա Մխիթարյանին:
Բաժանորդագրվեք մեր ալիքին Telegram-ում