ԵՐԵՎԱՆ, 31 ՀՈւԼԻՍԻ, ԱՐՄԵՆՊՐԵՍ: Առողջապահության համաշխարհային կազմակերպությունը Սիրիայի Կարմիր Մահիկի հետ համագործակցությամբ և Հալեպի մարզպետարանի աջակցությամբ մարդասիրական օգնություն է տրամադրել Հալեպի բնակիչներին: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, բժշկական օգնությունը կբաժանվի ահաբեկչական հարձակումներից տուժած բնակիչներին:

Հալեպի Առողջապահության ոլորտի ղեկավար Մուհամմադ Հազուրին նշել է, որ օգնության փաթեթների մեջ ընդգրկված են տարբեր տեսակի դեղորայք, բժկական գործիքներ, երեխաների համար նախատեսված հաբեր: Օգնությունը նախատեսված է ավելի քան հազար հիվանդի համար և կտրամադրվի ահաբեկչական խմբավորումների հսկողության տակ գտնվող 4 հիվանդանոցի:

Հալեպում ավելի քան 2 տարի շարունակվող բախումների հետևանքով բնակիչները հայտնվել են ծանր իրավիճակում: Մի կողմից ջրի, էլեկտրականության բացակայությունը, մյուս կողմից ամենօրյա ռմբակոծությունները և կառավարական ուժերի ու զինված խմբավորումների միջև բախումները քաոսային վիճակ են ստեղծել քաղաքում: