Նարեկ Մակարյանը՝ համաեվրոպական ուսանողական խաղերի ֆուտզալի առաջնության լավագույն ռմբարկու /լրացված/
ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Հայաստանի պետական տնտեսագիտական համալսարանի ֆուտզալի թիմը զբաղեցրել Է 14-րդ տեղը 24 մասնակիցների մեջ համաեվրոպական 2-րդ ուսանողանական խաղերի մրցաշարում: Հայաստանի մարզիկները 13-րդ տեղի համար մրցամարտում հիմնական ժամանակում ոչ-ոքի են խաղացել Գերմանիայի Մյունսթեր քաղաքի ուսանողների հետ եւ զիջել վերջիններիս միայն ետխաղային 7-մետրանոց հարվածներով:
Ինչպես «Արմենպրես»-ին տեղեկացրին Հայաստանի ուսանողական մարզական ֆեդերացիայից, տնտեսագիտական համալսարանի թիմը 9-16-րդ տեղերի համար պայքարում չեխական Օստրավայի համալսարանի թիմին զիջել էր 6:8 հաշվով, ապա 13-16-րդ տեղերի համար պայքարում 13:6 հաշվով առավելության հասել Կիպրոսի տեխնոլոգիական համալսարանի նկատմամբ: Հուլիսի 29-ին մեր տղաները 13-14-րդ տեղերը վիճարկեցին գերմանական Մունստերի համալսարանի ընտրանու հետ՝ խաղն ավարտելով ոչ-ոքի՝ 10:10: Հաղթողը որոշվեց հետխաղյա տուգանային հարվածներով, որտեղ առավելության հասան գերմանացիները՝ գրավելով 13-րդ տեղը:
Հայաստանյան թիմը ներկայացնող Նարեկ Մակարյանը ճանաչվեց ֆուտզալի առաջնության լավագույն ռմբարկու։ Հայաստանի պետական տնտեսագիտական համալսարանի տղաների ֆուտզալի հավաքականն առաջին անգամ էր մասնակցում նման մրցաշարի։ Անցկացարծ 6 հանդիպումերում հայ ուսանողները գրանցեցին 2-ական հաղթանակ և ոչ-ոքի, նույնքան էլ՝ պարտություն կրեցին:
ՀՊՏՀ թիմն այսօր վերադառնալու է Հայաստան։
Համաեվրոպական ուսանողական խաղերի մրցաշարը ընթանում Է Հոլանդիայի Ռոտերդամ քաղաքում: Այս մրցումներին մասնակցում են 45 երկրների 350 համալսարանների 5000-ից ավելի մարզիկներ:
Բաժանորդագրվեք մեր ալիքին Telegram-ում