ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ: Աշխարհում ամենամեծ աստղադիտակի շինարարությունը Միացյալ Նահանգների Հավայի կղզու Մաունա Կեա վահանաձեւ հրաբխի գագաթին կսկսվի ընթացիկ տարվա հոկտեմբերին: Այդ մասին, ինչպես տեղեկացնում է «Արմենպրես»-ը, ասված Է Ճապոնիայի Ազգային աստղադիտարանի հաղորդագրության մեջ:

Գերաստղադիտակի կառուցման նախագիծը գնահատվում է մեկ միլիարդ դոլար եւ ֆինանսավորվում է ԱՄՆ-ի, Կանադայի, Ճապոնիայի, Չինաստանի եւ Հնդկաստանի համալսարանների կողմից: Շինարարությունը ենթադրվում է ավարտել 2021 թվականին:   

Նոր աստղադիտակի վրա կտեղակայվի վիթխարի ներքին հայելի, որի տրամագիծը կկազմի 30 մետր: Դրա կենտրոնական մասը կհավաքվի 492 վեցանկյուն թիթեղներից: Դրա շնորհիվ փոքր օբյեկտների զանազանման հնարավորությունը ճապոնական «Սուբարու» հռչակավոր աստղադիտակի պարամետրերը կգերազանցի չորս, իսկ երկնային մութ մարմինների հայտնաբերման ունակությունները՝ նույնիսկ 200 անգամ:

Ենթադրվում Է, որ նոր գերաստղադիտակն աստղագետներին կօգնի դիտարկել այն օբյեկտները, որոնք գտնվում են Երկիր մոլորակից 13 միլիարդ լուսային տարի հեռավորության վրա, հաղորդել Է ՌԻԱ Նովոստին: