ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Youtube տեսահոսթինգում այսօր հայտնվել է «I love my country» («Ես սիրում եմ իմ երկիրը») տեսանյութ-սոցիալական գովազդը: «Արմենպրես»-ի փոխանցմամբ՝ տեսանյութն արդեն հասցրել է դիտել 170-ից ավելի օգտատեր: Տեսահոլովակի ռեժիսորն է Հարություն Շատյանը, իսկ պրոդյուսերը՝ Աշոտ Սարգսյանը: Սոցիալական գովազդի քասթինգն իրականացրել է «Individuum» ընկերությունը:

Տեսանյութի հեղինակները փորձել են ցույց տալ հանրությանը, որ հայրենիքի նկատմամբ սերը սկսվում է մանրուքներից: Հերոսներից մեկն աղտոտում է փողոցը՝ հատակին գցելով իր ծխախոտի մնացորդը, սակայն մյուսը, ով անվասայլակով հաշմանդամ է, բարձրացնում է այն և նետում աղբարկղը: Տեսանյութը եզրափակվում է հետևյալ բառերով` «Ես սիրում եմ իմ երկիրը, իսկ դո՞ւ»:

Տեսանյութի պրոդյուսեր Աշոտ Սարգսյանն իր ֆեսյբուքյան էջում նշել է. «Եթե ամեն մեկս ուշադիր լինենք մեր երկրի հանդեպ, ինձ թվում է` մեր երկրում շատ բան կփոխվի: Շնորհակալություն ստեղծագործական անձնակազմին: Ապրեք շատ»: