Հայաստանի նետաձգության ֆեդերացիան կարողացավ ապահովել Եվրոպայի առաջնության պատշաճ մակարդակ. Հական Չաքրօղլու
ԵՐԵՎԱՆ, 26 ՀՈՒԼԻՍԻ, ԱՐՄԵՆՊՐԵՍ: Հայաստանում հուլիսի 21-26-ը անցկացված նետաձգության Եվրոպայի 21-րդ առաջնությունն իր արժանի տեղն Է զբաղեցրել մարզաձեւի պատմության մեջ եւ այն նոր խթան կհանդիսանա նետաձգության հետագա զարգացման համար: Այդ մասին «Արմենպրես»-ի հետ զրույցում նշեց Եվրոպայի նետաձգության ֆեդերացիայի փոխնախագահ Հական Չաքրօղլուն` ամփոփելով մրցաշարի արդյունքները:
Ազգությամբ թուրք պաշտոնյան նշեց, որ արդեն երրորդ անգամն Է այցելում Հայաստան որպես Եվրոպական նետաձգության ֆեդերացիայի պատվիրակ եւ բոլոր դեպքերում Էլ հայաստանյան կազմակերպիչները կարողացել են արժանի մակարդակով անցկացնել մրցումները:
Այս անգամ դա ավելի բարդ խնդիր Էր, քանզի եվրոպական մրցումներին մասնակցեցին գրեթե 40 երկրների 300-ից ավելի մարզիկներ, ինչը ռեկորդային թիվ Էր, բայց Հայաստանի նետաձգության ֆեդերացիան կարողացավ ապահովել մրցումների պատշած մակարդակը:
Չաքրօղլուն նշեց, որ առաջնությունն աչքի է ընկել համառ մրցապայքարով եւ բարձր արդյունքներով:
Նրա խոսքով` օգոստոսի 5-ին Լեհաստանի Վրոցլավ քաղաքում մեկնարկող նետաձգության աշխարհի գավաթի խաղարկությանը կմասնակցեն մոտավորապես 50 երկրների մարզիկներ եւ հույս հայտնեց, որ նրանց թվում կլինեն նաեւ հայ նետաձիգները:
Բաժանորդագրվեք մեր ալիքին Telegram-ում