ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Ոստիկանության պետի տեղակալ Սամվել Հովհաննիսյանը հուլիսի 25-ին ընդունել է Համաշխարհային բանկի ներկայացուցիչներին: Հանդիպմանը մասնակցել են ոստիկանության շտաբի պետ Վարդան Եղիազարյանը և Ճանապարհային ոստիկանության պետ Արսեն Գալստյանը: Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի եւ լրատվության վարչությունից, ոստիկանության շտաբի պետը ներկայացրել է ՀՀ կառավարության 2013 թվականի փետրվարի 7-ի թիվ 109-Ն որոշմամբ հաստատված Հայաստանի Հանրապետության ոստիկանության գործունեության ոլորտում 2013-2014 թվականների բարեփոխումների ծրագիրը: Քննարկվել են ծրագրային այն միջոցառումները, որոնց իրականացումը համակարգի համար առաջնահերթ ու արդիական է, և դրանց կենսագործումն ու ֆինանսավորումը հնարավոր կլինի միջազգային կազմակերպությունների աջակցությամբ:

Համաշխարհային բանկի ներկայացուցիչները հավաստիացրել են, որ ներկայացված առաջարկները կուսումնասիրվեն ու միջոցներ կձեռնարկվեն դրանք համատեղ կենսագործելու ուղղությամբ: