ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Երևանի թատրոնի և կինոյի պետական ինստիտուտում օրերս ցուցադրվել են «Հայ Արտ Սինեմա» հիմնադրամի կողմից իրականացվող  «Կինոռեժիսուրայի բարձրագույն դպրոց» դասընթացների ուսանողների ավարտական ֆիլմերը: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, ցուցադրությանը ներկա են եղել «Հայ Արտ Սինեմա» հիմնադրամի հոգաբարձուների խորհրդի նախագահ, ՀՀ մշակույթի նախարար Հասմիկ Պողոսյանը, խորհրդի անդամներ` ԵԹԿՊԻ ռեկտոր Դավիթ Մուրադյանը, ռեժիսոր Ռոման Բալայանը, Հայաստանի կինեմատոգրաֆիստների միության նախագահ Ռուբեն Գևորգյանցը, «Մոսկվա» կինոթատրոնի գլխավոր տնօրեն Մարտուն Ադոյանը, ինչպես նաև հրավիրյալ փորձագետներ` կոմպոզիտոր Տիգրան Մանսուրյանը, ԵԹԿՊԻ կինոյի, հեռուստատեսության և անիմացիայի ֆակուլտետի դեկան Անետա Երզինկյանը, ԵԹԿՊԻ կինոյի ամբիոնի վարիչ Գարեգին Զաքոյանը, ռեժիսոր Էդգար Բաղդասարյանը: 

Ցուցադրվել է ուսանող-հեղինակների դիպլոմային 10-ը ֆիլմ, որոնք նկարահանվել են ռեժիսոր, սցենարիստ, պրոդյուսեր Ռոման Բալայանի ղեկավարությամբ: Ֆիլմերի քննարկման արդյունքում, որպես առավել հաջողված աշխատանքներ նշվել են Տ. Հակոբյանի «Ավելորդը» և Գ. Մադոյանի «Ճանապարհ» ֆիլմերը:

Քննարկվել են նաև «Կինոռեժիսուրայի բարձրագույն դասընթացների» շարունակման, կազմակերպչական, ինչպես նաև մասնագիտական աշխատանքների բարելավման հարցերը: Համաձայն քննարկման ընդհանուր եզրակացության` «Կինոռեժիսուրայի բարձրագույն դասընթացները» գնահատվել են որպես կինոոլորտում երիտասարդ ռեժիսորների որակավորման և մասնագիտական կատարելագործման անհրաժեշտ գործընթաց: Խորհուրդը նպատակահարմար է գտել հաջորդ ուսումնական տարվանից «Կինոռեժիսուրայի բարձրագույն դասընթացները» փոխարինել «Ռեժիսորական և սցենարական բարձրագույն դասընթացներով»` հաշվի առնելով հայ կինոյի համար սցենարական կադրեր պատրաստելու անհրաժեշտությունը:

Երևանի թատրոնի և կինոյի ինստիտուտի կողմից համապատասխան ուսումնական ծրագրերը մշակելուց և հաստատելուց հետո, հիմնադրամի և ինստիտուտի միջև կկնքվի համապատասխան համագործակցության պայմանագիր: