Գավառում կազմակերպվեց աշխատանքի տոնավաճառ
ԳԱՎԱՌ, 25 ՀՈՒԼԻՍԻ, ԱՐՄԵՆՊՐԵՍ: Գավառի մշակույթի տանը Աշխատանքի եւ սոցիալական հարցերի նախարարության աշխատակազմի զբաղվածության պետական գործակալության նախաձեռնությամբ եւ պետական բյուջեի ֆինանսավորմամբ անցկացվեց աշխատանքի տոնավաճառ: Տոնավաճառին մասնակցում էին մարզի 26 գործատուներ, որոնք աշխատանք փնտրողներին էին առաջարկում 80 առկա եւ 16 սպասվելիք աշխատատեղեր:
Ինչպես «Արմենպրես»-ին տեղեկացրեց ՀՀ աշխատանքի եւ սոցիալական հարերի նախարարության աշխատակազմի զբաղվածության պետական գործակալության պետ Արտակ Մանգասարյանը, այս տարի պետական բյուջեով նախատեսված է հանրապետությունում իրականացնել 11 տոնավաճառներ, որոնցից 7-րդն անցկացվեց Գավառ քաղաքում: Գեղարքունիքի մարզում այս տարվա հունիսի 1-ի դրությամբ գրանցված աշխատանք փնտրողների թիվը կազմում է 5389, ինչը նախորդ տարվա նույն ժամանակահատվածի համեմատ աճել է 0,4 տոկոսով: Տարեսկզբին աշխատանքի են տեղավորվել մարզի 316 աշխատանք փնտրողներ:
Շարունակում է բարձր մնալ գործազուրկ կանանց թիվը, որը կազմում է գործազուրկների թվի 68,3 տոկոսը: Գործազուրկների թվում գերակշռում են ճարտարագետները, բուժքույրերը, տեխնիկները, հաշվապահներն ու վարորդները: Գործազուրկ քաղաքացիները նմանօրինակ տոնավաճառներին մասնակցում են` իրենց հնարավորություններն ու անձնական տվյալները գործատուի կողմից առաջարկվող թափուր աշխատատեղերին համապատասխանեցնելու նպատակով եւ աշխատանքի անցնելու ակնկալիքով:
Եթե առաջին անգամ աշխատանք փնտրողը նման տոնավաճառում չի գտնում իրեն հարմար աշխատանք կամ չունի անհրաժեշտ հմտություններ եւ աշխատանքային փորձ, ապա մասնագետները խորհուրդ են տալիս չհուսահատվել: Քանզի այս մասին եւս հոգ է տարվում` իրականացվում է մասնագիտական ուսուցում: Զբաղվածության պետական գործակալությունն իրականացնում է «Աշխատավարձի մասնակի փոխհատուցումը գործատուին» եւ նման այլ ծրագրեր՝ մասնավորապես աշխատատեղի հարմարեցումը գործատուին: Խոսքը վերաբերում է հաշմանդամություն ունեցողներին, որոնց աշխատանքի վերցնող գործատուին են տրամադրվում տարբեր տեսակի սարքեր: Գավառի զբաղվածության տարածքային կենտրոնի հետ ակտիվ համագործակցության համար որոշ գործատուներ արժանացան զբաղվածության պետական գործակալության շնորհակալագրին:
Խոսրով խլղաթյան
Բաժանորդագրվեք մեր ալիքին Telegram-ում