Աշխարհի խոշորագույն ինտերնետ-ռիթեյլերի՝ Amazon-ի զուտ վնասն աճել է 18 անգամ
ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Աշխարհի խոշորագույն ինտերնետ-ռիթեյլերի՝ Amazon-ի զուտ վնասը 2014 թվականի երկրորդ եռամսյակում աճել է 18 անգամ, չնայած հասույթի ավելացմանը, տեղեկացնում է «Արմենպրես»-ը:
Ինչպես հաղորդվում է ընկերության մամուլի տեղեկագրում, ապրիլ-հունիսին նրա զուտ վնասը կազմել է 126 մլն դոլար կամ 27 ցենտ մեկ բաժնետոմսի հաշվարկով՝ անցյալ տարվա համապատասխան ժամանակաշրջանի 7 մլն դոլարի կամ մեկ բաժնետոմսի հաշվով 2 ցենտի համեմատությամբ:
Ընկերության հասույթն աճել է 23 տոկոսով եւ հասել 19,34 մլրդ դոլարի՝ մեկ տարի առաջվա 15,7 մլրդ դոլարի դիմաց:
Ընթացիկ եռամսյակում Amazon-ը պլանավորում է հասույթ ստանալ 19,7-21,5 մլրդ դոլարի չափով:
Ինտերնետ-ընկերության բաժնետոմսերի գնանշումները հաշվետվության հրապարակումից հետո հուլիսի 24-ի էլեկտրոնային սակարկությունների ընթացքում ընկել են ավելի քան 10 տոկոսով: Ընկերության կապիտալիզացիան այս տարվա սկզբից կրճատվել է 10 տոկոսով՝ մինչեւ 164,8 միլիարդ դոլար, հաղորդել է «Ինտերֆաքս» գործակալությունը:
Բաժանորդագրվեք մեր ալիքին Telegram-ում