Հայաստանում մեկնարկեց նետաձգության Եվրոպայի առաջնությունը
ԵՐԵՎԱՆ, 21 ՀՈՒԼԻՍԻ, ԱՐՄԵՆՊՐԵՍ: Հայաստանը հյուրընկալել է նետաձգության համաեվրոպական ստուգատեսն, իսկ Նետաձգության միջազգային ֆեդերացիայի նախագահ Ուգուր Էրդեները և եվրոպական ֆեդերացիայի նախագահ Մարիո Սկալցելին հայտարարել են, որ գոհ են Եվրոպայի առաջնության կազմակերպման մակարդակից:
Ֆեդերացիաների նախագահներն այս մասին ասացին հուլիսի 21-ին Արմավիրի մարզում մրցաշարի հանդիսավոր բացման ժամանակ, որին ներկա էր ՀՀ նախագահ Սերժ Սարգսյանը:
«Եվրոպայի առաջնության բոլոր մասնակիցները ուրախ են, որ հնարավորություն ունեն միմյանց հանդիպել Հայաստանում եւ մրցել մրցաշարի պարգեւների համար»,- ասաց Էրդեները` ողջունելով մրցաշարի մասնակցիներին և հյուրերին:
Հայաստանի նետաձգության ֆեդերացիայի նախագահ Նազիկ Ամիրյանը, իր խոսքում շնորհակալությունը հայտնեց մարզաձեւի միջազգային կառույցների ղեկավարներին եվրոպական առաջնությունն անցկացնելը Հայաստանին վստահելու համար: Նա
նաև շնորհակալություն հայտնեց ՀՀ նախագահին` մրցաշարի նկատմամբ մեծ ուշադրություն ցուցաբերելու համար: «Հայաստանը ունի նետաձգության խոշոր միջազգային մրցումների կազմակերպման փորձ, մասնավորապես Գրան-պրի կարգի մրցումների եւ կասկած չկա, որ այս մրցաշարը նույնպես հաջողությամբ կընթանա»,-ասել է Ամիրյանը:
Հայաստանի նետաձգության ֆեդերացիայի նախագահը մարզաձեւի ազգային ֆեդերացիայի անունից «Ոսկե նետ» հուշանվերը հանձնեց նետաձգության միջազգային ֆեդերացիայի նախագահ Էրդեներին:
Մրցաշարի հանդիսավոր բացման արարողությունից հետո տեղի ունեցավ համերգ, որին մասնակցեցին հայկական էստրադայի մի շարք առաջատար երգիչներ, իսկ հուլիսի 22-ին նետաձգության Եվրոպայի առաջնության մասնակիցները կսկսեն իրենց մրցավեճերը: Առաջնությանը մասնակցում են 38 երկրների շուրջ 300 մարզիկներ եւ 450 հյուրեր` այդ թվում Թուրքիայի և Ադրբեջանի պատվիրակները:
Բաժանորդագրվեք մեր ալիքին Telegram-ում