ԵՐԵՎԱՆ, 25 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելեր» հեղինակային նախագծի վարկանիշային աղյուսակն այս շաբաթ գլխավորում է երկար հիվանդությունից հետո ապրիլի 17-ին կյանքի 88-րդ տարում վախճանված կոլումբիացի գրող Գաբրիել Գարսիա Մարկեսի «Վերհիշելով իմ տխուր պոռնիկներին» վիպակը: Այն 2010 թ. ռուսերենից թարգմանել է Հովհաննես Այվազյանը: Երկը լայն ճանաչում է գտել Հայաստանում` շատ հաճախակի հայտնվելով բեսթսելերների շարքում:

Անտուան դը Սենտ Էքզյուպերիի «Փոքրիկ իշխանը» ստեղծագործությունը այսշաբաթ երկրորդ հորիզոնականում է: Գիրքը հրատարակվել է 1943-ին և համարվում է Էքզյուպերիի ամենահայտնի երկը: Այն լույս է ընծայել «Անտարես» հրատարակչությունը: Գրախանութներում արդեն մնացել են ստեղծագործության հաշված օրինակներ: «Փոքրիկ իշխանը» թարգմանվել է ավելի քան 190 լեզվով և վաճառվել ավելի քան 80 միլիոն տպաքանակով:

Գերմանացի գրող Ֆրանց Կաֆկայի «Դղյակը» զբաղեցնում է վարկանիշային աղյուսակի երրորդ հորիզոնականը: Այն համարվում է 20-րդ դարի գրականության մեծագույն նվաճումներից մեկը: 

Չորրորդ հորիզոնականն է զբաղեցնում «Ոսկե եղեգն» պետական գրական մրցանակի դափնեկիր երջանկահիշատակ Լևոն Խեչոյանի«Մհերի դռան գիրքը» վեպը, որը լույս է տեսել վերջերս: Գրողի մահվանից հետո այն հրատարակել է «Անտարես» հրատարակչությունը: Գիրքն առաջին անգամ փետրվարի 28-ին ներկայացվեց հանրությանը և միանգամից ռեկորդային վաճառք արձանագրեց:

Գրիգոր Նարեկացու «Մատյան ողբերգության. Տաղեր» գիրքը զբաղեցնում է հինգերորդ հորիզոնականը: Այն հանրությանը հայտնի է նաև «Նարեկ» անունով և ամենաճանաչված ու կարդացված միջնադարյան հայերեն ստեղծագործությունն է: Ըստ ժողովրդի մեջ արմատացած համոզմունքի, պոեմն առանձնանում է նաև իր հրաշագործ ներգործությամբ և բուժիչ հատկությունով: «Նարեկ»-ն այն բացառիկ գիրքն է, որն ահա արդեն մեկ տարուց ավելի ամեն շաբաթ եղել է գործակալության վարկանիշային աղյուսակում:

«Երևանյան բեսթսելեր»-ի վեցերորդ հորիզոնականում Հայաստանի նախկին արտգործնախարար Վարդան Օսկանյանի «Անկախության ճանապարհով. փոքր երկրի մեծ մարտահրավերները» հուշագրությունների գիրքն է: Արտաքին գործերի նախարարությունում աշխատելու տարիների իրադարձություններից բացի, հեղինակը դրվագներ է ներկայացնում իր կենսագրությունից և անցած ճանապարհից:

Բրազիլացի ժամանակակից գրող  Պաուլո Կոելյոյի  հայտնի «Տասնմեկ րոպե»-ն նույնպես ընդգրկված է վարկանիշային աղյուսակում: Այս շաբաթ այն յոթերորդ հորիզոնականում է:  Գիրքը պատմում է Մարիա անունով մի մարմնավաճառի, նրա երազանքների, հասունացման և սիրո մասին: Այն սկսվում Է հեքիաթի պես և հեքիաթի պես Էլ ավարտվում: Անցնելով ամենատարբեր փորձությունների միջով՝ Մարիան ի վերջո հասկանում Է, որ իսկական սեռազգայական վայելքն անհնար Է առանց մարմինների և հոգիների ներդաշնակության, ինչը մարդուն կարող Է պարգևել միայն իսկական սերը:  

 Բեսթսելերների ցանկում ընդգրկված հաջորդ գիրքը ամերիկացի գրող Ֆրենսիս Սքոթ Ֆիցջերալդի «Մեծն Գեթսբին» է, որն առաջին անգամ հրատարակվել է 1925 թ. և համարվում է ամերիկյան գրականության մեջ «ջազի դարաշրջանին» բնորոշ ստեղծագործություններից մեկը: 

Վիլյամ Շեքսպիրի «Համլետը» ևս բեսթսելերների ցանկում է: Այն զբաղեցնում է իններորդ հորիզոնականը: «Համլետը» համարվում է Շեքսպիրի ամենահաջողված ու նշանավոր ստեղծագործությունը։ Գրվել է 1600-ականների սկզբին և առաջին անգամ լույս է տեսել 1603-ին: Այս պիեսի հիման վրա նկարահանվել են բազմաթիվ կինոնկարներ, բեմադրվել բազում ներկայացումներ։ 

«Երևանյան բեսթսելերն» այս շաբաթ եզրափակում է գերմանացի գրող Բերնհարդ Շլինկի «Ընթերցողը» վեպը: Այն տպագրության առաջին իսկ օրվանից արժանացավ ընթերցողների ուշադրությանը: Վեպը ներկայացնում է տասնհինգամյա պատանու և երեսունվեցամյա կնոջ սիրո պատմությունը, որն ընդհատվում է այդ կնոջ անսպասելի անհետացմամբ: Տարիներ անց պատանին, որն արդեն իրավաբանություն էր ուսանում, կնոջը հանդիպում է դատարանում: Պարզվում է, նա հսկիչ է եղել համակենտրոնացման ճամբարում: Վեպում յուրօրինակ ձևով քննարկվում են Հոլոքոստի, նացիոնալ-սոցիալիստական ժամանակների իրողությունները, մեղքի և քավության խնդիրները: 

Վարկանիշային ցուցակի կազմման հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ գիրք» (54-07-06), «Էդիթ Պրինտ» (57-70-09), «Բյուրոկրատ» (50-01-52), «Բուկինիստ» (53-74-13), «Արտ բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական բնույթի գրքերն ու դասագրքերը:

Տեղ	Փոփ.	Գիրք		Հրատ.	Քանակ
1	+1		Գաբրիել Գարսիա Մարկեսի             «Վերհիշելով իմ տխուր պոռնիկներին»	ՎԱ-ՀԱ	17
2	+2		Անտուան դը Սենտ Էքզյուպերիի «Փոքրիկ իշխանը»	Անտարես	16
3	*		Ֆրանց Կաֆկայի «Դղյակը»	Ապոլոն	10
4	-3		Լևոն Խեչոյանի «Մհերի դռան գիրքը»	Անտարես	8
5	*		Գրիգոր Նարեկացու «Մատյան ողբերգության.Տաղեր»	Զանգակ	7
6	*		Վարդան Օսկանյանի «Անկախությանճանապարհով. փոքր երկրի մեծ մարտահրավերները»	Անտարես	6
7	*		Պաուլո Կոելյոյի «Տասնմեկ րոպե»	Գիտանք	6
8	0		Ֆրենսիս Սքոթ Ֆիցջերալդի «Մեծն Գեթսբին»	Զանգակ	5
9	*		Վիլյամ Շեքսպիրի «Համլետ»	Անտարես	5
10	*		Բերնհարդ Շլինկի «Ընթերցողը»	Զանգակ	5