Նյույորքյան ռադիոյում հայ իրավաբանն ու հաղորդավարը խոսել են Հայոց ցեղասպանության մասին
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ։ Նյու Յորքի քաղաքային WBAI/NYC 99.5 FM ռադիոյի եթերում Ամերիկայի հայկական համագումարի նախկին անդամ, իրավաբան Մարկ Մոմջյան խոսել է Հայոց ցեղասպանության մասին։ Ինչպես «Արմենպրես»-ին տեղեկացրին Ամերիկայի հայակական համագումարից, նա մասանկցել է Beyond the Pale (Սահմանից դուրս) շոուին, որն ուսումնասիրում է հրեական մշակույթը:
Մարկ Մոմջյանը Ֆիլադելֆիայի բնակիչ է և ունի շուրջ 25 տարվա իրավաբանական փորձ։ Պաշտպանելով հասարակական արդարությունն ու քաղաքացիական իրավունքները, այդ թվում` աղքատների և անտունների իրավունքները՝ Մոմջյանը դարձել է Հայկական կենտրոնի ներկայացուցիչը Կոլումբիայի համալսարանում։
Ռադիոհաղորդման ընթացքում հաղորդավար Ադամ Սաքսը ներկայացրել է Հայոց ցեղասպանությունը։ Նա հաղորդումը սկսել է ԱՄՆ նախագահ Բարաք Օբամայի, Սենատի արտաքին հարցերի պատասխանատու Ռոբերտ Մենենդեսի, ԱՄՆ նախկին դեսպանների, Հոլոքոստն ուսումնասիրող գիտնականների և հայոց ցեղասպանությունը ուսումնասիրողների աուդիոնյութերով։ Հաղորդման վարողը զուգահեռներ է անցկացրել Հայոց Եղեռնի և Հոլոքոստի միջև։
«Առաջին համաշխարհային պատերազմի տարիներին անցկացված ջարդերի ընթացքում սպանված հայերի թիվը գրեթե այնքան է, որքան Երկրորդ համաշխարհայինի ժամանակ սպանված հրեաներինը։ Այնպես որ, կարող ենք ասել, որ դրանք նման են»,- ասել է Սաքսը։ Նա նշել է, որ հայերն ու հրեաները բախվել են նույն խնդրին։
Բաժանորդագրվեք մեր ալիքին Telegram-ում