ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Հայաստանի Գիտությունների ազգային ակադեմիայի նախագահ Ռադիկ Մարտիրոսյանն ակադեմիայի տարեկան ընդհանուր ժողովի ընթացքում խոսատացավ անձամբ հեծանիվ նվիրել երիտասարդ անդամներից մեկին: «Արմենպրես»-ի հաղորդմամբ՝ ժողովի ավարտին ելույթի իրավունք խնդրեց երիտասարդ գիտնական Ղազար Գալոյանը, ով անդրադարձավ գիտնականների սոցիալական ծանր պայմաններին՝ ընդգծելով, որ հարկավոր է նպաստավոր պայմաններ ստեղծել գիտնականների համար, որպեսզի նրանք էլ կարողանան իրենց արդյունավետ աշխատանքով նպաստել երկրի զարգացմանը: «Ես պատրաստվում եմ մնալ և աշխատել իմ հայրենիքում՝ Հայաստանում, պատրաստ եմ ծառայել իմ երկրին, սակայն միևնույն ժամանակ ակնկալում եմ արժանավայել աշխատավարձ և աշխատանքի նպաստավոր պայմաններ»,- ասաց Գալոյանը:

Երիտասարդ գիտնականը դիմեց Հայաստանի ԳԱԱ նախագահ Ռադիկ Մարտիրոսյանին՝ նշելով, որ կարելի է գիտնականներին տրվող խրախուսանքների և մեդալների հետ նաև նվերներ տալ: «Օրինակ, ինձ համար ցանկալի կլիներ նվեր ստանալ մեկ հեծանիվ: Հեծանիվը քաղաքակիրթ երթևեկության միջոց է, և եթե մեր նախարարներն էլ սկսեն երթևեկել հեծանիվով, դա մեր հասարակության բարեկեցությանն ուղղված քայլ կլինի»,- ասաց Գալոյանը:

Երիտասարդ գիտնականի ելույթին արձագանքեց Ռադիկ Մարտիրոսյանը. «Հեծանիվը ես անձամբ խոստանում եմ»,- ասաց նա: Ռադիկ Մարտիրոսյանին էլ արձագանքեց ժողովի ներկա ՀՀ Նախագահ Սերժ Սարգսյանը. «Նախարարների՞ն, թե երիտասարդի՞ն»,- կատակեց Նախագահը:

Հայաստանի Գիտությունների ազգային ակադեմիայում ապրիլի 23-ին տեղի ունեցավ Ակադեմիայի տարեկան ժողովը: Ժողովին մասնակցում էր նաև ՀՀ Նախագահ Սերժ Սարգսյանը: