Հայոց ցեղասպանության հիշատակին նվիրված ամենամյա հանրահավաք տեղի կունենա ԱՄՆ Մոնթեբելո քաղաքում
ՄՈՆԹԵԲԵԼՈ, 22 ԱՊՐԻԼԻ, ԱՐՄԵՆՊՐԵՍ: ԱՄՆ Սան Գաբրիել հարթավայրի Հայ դատի հանձնախմբի նախաձեռնությամբ ապրիլի 23-ին տեղի կունենա Հայոց ցեղասպանության հիշատակին նվիրված ամենամյա հանրահավաք, որը կշարունակվի մինչև ուշ գիշեր: Ինչպես հաղորդում է «Արմենպրես»-ը` վկայակոչելով «Ասպարեզ» պարբերականը, արարողությունը տեղի կունենա Հայոց ցեղասպանության նահատակների հուշարձանի մոտ` Մոնթեբելո քաղաքի Բիքնել զբոսայգում:
Սան Գաբրիել հարթավայրի Հայ դատի հանձնախումբը հրավիրում է հայ համայնքի բոլոր անդամներին միանալ Հայոց ցեղասպանության ոգեկոչման արարողությանը և հարգանքի տուրք մատուցել 1.5 միլիոն հայ զոհերի հիշատակին: «Հրամայական է, որպեսզի մենք ամեն տարի հավաքվենք` հիշելու և արձագանքելու համար, բայցև հրամայական է համաձայնեցված հավաքական քայլեր ձեռնարկել հայերի իրավունքների ճանաչումը երաշխավորելու ուղղությամբ»,- նշել է Սան Գաբրիել հարթավայրի Հայ դատի հանձնախմբի նախագահ Վիգեն Բագրատունին:
Ապրիլի 23-ի հիշատակի արարողությանը բանախոսությամբ հանդես կգան Տեր հայր Վազգեն Մովսիսյանը և դոկտոր Լևոն Մարաշլյանը: Կհնչեն երաժշտական կատարումներ:
Բաժանորդագրվեք մեր ալիքին Telegram-ում