Հայոց ցեղասպանության տարելիցի կապակցությամբ ԱՄՆ-ում կցուցադրվի «Լռության սպիները» ֆիլմը
ՈւՈՐՔԵՍԹԵՐ, 21 ԱՊՐԻԼԻ, ԱՐՄԵՆՊՐԵՍ: ԱՄՆ Մասաչուսեթս նահանգի Ուորքեսթեր հանրային գրադարանում Հայոց ցեղասպանության 99-րդ տարելիցին «Լռության սպիները» վավերագրական ֆիլմ կցուցադրվի: Ֆիլմի հեղինակներն են ճանաչված և վաստակաշատ ֆոտոլրագրող, ռեժիսոր Նուբար Ալեքսանյանը և Էբբի Ալեքսանյանը: Ինչպես հաղորդում է «Արմենպրես»-ը` վկայակոչելով ամերիկյան «Telegram.com» լրատվական կայքը, ապրիլի 23-ին ցուցադրվելիք «Լռության սպիները» վավերագրական ֆիլմը պատմում է հոր և դստեր մասին, ովքեր հաղթահարել են հարյուրամյա լռության և ժխտման սահմանը` իրենց ընտանեկան ողբերգական անցյալի հետ հաշտվելու համար: Ֆիլմը վեր է հանում ժամանակակից հայերի վրա ցեղասպանության թողած ազդեցությունը և այն ուղիները, որոնց միջոցով մինչ օրս շարունակվում են հայ ժողովրդի դեմ հալածանքները:
Հայոց ցեղասպանության նահատակների ոգեկոչման ծրագրի շրջանականերում հանդիսատեսին կներկայացվեն գրքեր և տեսանյութեր գրադարանի` Վարդանի որդիներ և դուստրեր հավաքածուից: Ելույթով հանդես կգա Ուորքեսթերի քաղաքապետ Ջոզեֆ Փեթթին:
Բաժանորդագրվեք մեր ալիքին Telegram-ում